Assit takukkit: Timersortartut nersornaaserneqarneranni kalaallit peqataapput

Sportslørdag tassaavoq ukiumoortumik Odense Idrætshalimi pisartoq, tasssani timersuutinut assigiinngitsunut nersornaasiisoqartarluni, fynimi timersortartunik nersornaasigassatut piukkunneqartunik toqqaareerluni, tamakkualu nersornaasitinneqartarlutik.

Ilaatigut tassaapput ukiumi timersullammak, ukiumi kajumissutsiminik pisortaallammak, ukiumi piukkunnaateqarnerpaatut nassaaq, kiisalu kajumissaasiinerit assigiinngitsut, ilaatigut isiginnaartut kajumissaataat, tassungalu piukkunneqartut ilagaat Minik Dahl Høegh.

Taasineq nettimi ingerlanneqarpoq, Minik Dahl Høeghili amerlanerpaanik taaneqarsimanngilaq.

Timersuutit suulluunniit

Aaqqissuussisut naatsorsuutigaat arfininngornerup ingerlanerani Odense Idrætshalip timersortarfissuini hal-ini marlunni inuit 5000-t immikkoortortaqarfinnut assigiinngitsunit takkussimasut.

Tassani sikkilertarfeqarpoq. Ishockeymi unammisarfeqarpoq. Soorunamilu arsaattarfeqarluni. Takkuttorpassuit sammisanik assigiinngitsunik misiliisinnaapput.

klubbit assigiinngitsut nittarsaassivii angalaarfigalugit. GOG-p nittarsaaviani taluneqarsinnaavoq Minik Dahl Høegh, taanna nammineq najuutinngikkaluartoq, Malmömi assammik arsarluni nunanut allanut unammisartut unammeqatigigamigit. Nassuiaataa: Pap-imik assinganik sanaaq assingulluinnartoq.

Timersuutini assigiinngitsuni timersortartorpassuit isiginnaarneqarsinnaapput, soorlu sukuutsertartut, petangque-rtartut, sikkilertartut, eqaarsaartartut, bordtennis-ertartut, minigolfertartut allarpassuillu.

Aamma fynimiut timersortartut tusaamasarpassuit naapinneqarsinnaapput immaqalu atsiornerat pissarsiaralugu. Assersuutigalugu speedwaymik unammisartoq, pingasoriarluni nunarsuarmi pissartaasarsimasoq Nicki Pedersen ulloq taanna ulapippoq, taanna assammik arsartartoq Jakob Larsenip aapparisaa, Kamilla Kristensen peqatigalugu tikilluaqqusimmat.

Kommunip nersornaasiuttagaa Jakob Larsenimut

Svendborg Kommunemeersut pingasut, Svendborgip borgmesteria Lars Erik Hornemann, GOG-p sungiusaasua Jakob Larsen basketballertartorlu Clus Magaard, Svendbodrg Rabbits-imeersoq, Kommunep nersornaataanik taaneqartartumik nersornaaserneqarputr. GOG Svendborg Kommuneani klubbiuvoq.

Fynimi kommunit qulit tamarmik pingasunik aallartitaqarput, tamakkualu sikkilertarfimmi sikkilinik unamminerni assigiinngitsuni unammipput. Svendborgimeersut sukkanerpaapput nersornaaserneqarlutillu.

Ukiumi timersullammak

Orienteringsløb-erluni arpattartoq VM-imilu kuultinnassimasoq Emma Klingenberg 2015-imi fynimi timersullammattut toqqarneqarpoq.