Skip to main content

Assit takukkit: Rusland tatigisinnaavarput

Issittoq pillugu Rusland suleqatiginnikkusunnerminik erseqqissaajuartarpoq, suleqateqarnerpullu ingerlatiinnassavarput, taama Sara Olsvig aamma nunanut allanut ministeri Martin Lidegaard isumaqarput

Ruslandimik politikkikkut suleqateqarsinnaavugut akerleriiutigaluta?

Taama apeqquteqarpoq tallimanngornermi Bornholmimi oqallinnermi apeqqarissaartoq DR-imi tusagassiortoq Lene Johansen nunanut allanut ministerimut Martin Lidegaardimut, Radikale Venstremeersumut.

- Aap, taamaasiorsinnaavugut, Martin Lidegaard Nunat Avannarliit tupianni oqallinnermi oqarpoq. Oqallititsineq innuttaasut naapinneranni Folkemødemik taagorneqartumi  Allingemi ingerlanneqarpoq.

Innuttaasut naapinnerat Allingemi sisamanngornermi ualigaa ammarpoq maannalu ingerlanneqaleruttorpoq. Inuit Ataqatigiit folketingemi ilaasortaatitaat Sara Olsvig oqallinnermut ”Nunat avannarliit politikkikkut inissisimanerat nutaaq” tallimanngornermi ullup qeqqata siorna Nunat Avannarliit sinniisoqatigiivisa, Nunallu Avannarliit ministerådiisa tupianni ingerlanneqartumut aggersarneqarsimavoq. Ilaatigut oqalliseqataapput nunanut allanut ministeri Martin Lidegaard, Radikale Venstremeersoq aamma Lene Espersen Konservativimeersoq.

Rusland issittoq pillugu suleqatiginnikkumavoq
Konservativimeersoq isumaqarpoq Danmark ”sorsunneq nillertoq”-mut tunngatillugu sukaterisariaqartoq. Espersenimi isumaqarpoq russit Ukrainimik tigusarinninnerat issittumut nunanullu avannarlernut siammaatipallassinnaasoq. Nunanut allanut ministerili Martin Lidegaard Sara Olsvigilu isumaqatigiipput Danmark Kalaallit Nunaallu Ruslandimut tunngatillugu eqqissisimasumik pissuseqaannassasut.

- Soorunami takuneqarsinnaavoq Rusland Ukrainemut peqqarniitsumik maanna pissuseqartoq, tamannali issittoq pillugu suleqatigiinnitsinnut kalluussartariaqanngilaq. Rusland issittoq pillugu suleqatigiinnissamik annertuumik piumassuseqarnini takutittarpaa aamma issittumi nunap inoqqaavisa atugarisaat pillugit apeqqutinut tunngatillugu, oqarpoq Sara Olsvig.

Udenrigsminister Martin Lidegaard IAp folketingimi ilaasortaatitaa isumaqatigaa.

- 'Sorsunneq nillertoq'-arneranik oqariartuuteqartoqarnera isumaqatiginngilara. Illuatungaanilli Ruslandi issittoq nunallu avannarliit pillugit politikkikkut suliniuteqarnermi malinnaalluartuuvoq , Lidegaard oqarpoq.

Oqallititsisoq Lene Johansen nunanut allanut ministeri aperaa Rusland tatigineqarsinnaanersoq issittumi ajutoortoqartillugu ikiuunnissamik saaffigineqarpat.

-Aap, Rusland tatigilluinnarpara issittoq pillugu suleqatitut, nunanut allanut ministeri tikkuussorlugulu ungasinngitsumi issittumi inatsisartuutitani ilaasortat ataatsiminneranni Christiansborgimi ingerlanneqartumi, Ruslandillu peqataaffigisaani, ajunngillluinnartumik akaareqatigiinneq.

Inuttaasut nipeqassapput ersarissumik
Martin Lidegaardip tikkuartorpaa issittumi nunanilu avannarlerni innuttaasut isiginiarneqarnerusariaqartut. Olsvig isumaqarportaaq innuttaasut nipaat nipaat tusaaniarneqarusariaqartoq.

- Issittoq naalagaaffinni eqqartorneqarnera annertusiartuinnartillugu issittumi innutaasut nipaat annikillinissaa ilimasuutigineqarsinnaavoq. Tamanna pinngitsoortariaqarpoq. Issittoq pillugu siunnersuisooqatigiit suleriaasiat nukittorsartariaqarpoq, nunallu inoqqaavisa kattuffii tassani inissaqartuarnissaat qularnaartariaqarput. Soorlu aamma issittumi innuttaasut ersarissumik nipeqarnissaat politikkikkut oqimaatsuni soorlu illersornissaq, sillimaniarnissarlu politikki eqqartorneqartillugit, Sara Olsvig oqarpoq.    

Assit ataani takukkit

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER