Odense
Assit takukkit: Rasmus Lyberth juullimut tusarnaartitsisoq
Rasmus Lyberth Odensemi juullimut tusarnaartitseqqippoq
Ukiut siuliitut Nordatlantisk Husimi tusarnaartitsineq ingerlavoq, billetsillu tamarmik pisiarineqarsimallutik. Tusarnaariallu 200-it ikinnerunngitsut nuannisarnissaminnik ilimasuutaat eqqorlugu tusarnaartinneqarput.
Juullilerneranut ilaavoq
Juullilernerani Rasmus Lyberthip nipilersoqatinilu tusarnaartitsisarnerat ileqqunngorsimavoq. Steen Møller Odensep kommuniani siunnersorti Nordatlantisk Husimilu siulersuisuni siulittaasoq qilanaarinninnerpaat ilagisarpaat.
- Rasmus Lyberthip tusarnaartitsinerani peqataalluni nuannernerpaasarpoq, Steen Møller Sermitsiaq.AG-mut oqarpoq nangillunilu:
- Nordatlantisk Hus pilersinneqalermat aaqqissuussat taamaattut takorluugarineqarput.
Tusarnaartitsineq
Rasmus Lyberth tusarnaartitsilluartorujussuuvoq Nordatlantisk Husimilu amerlasooriarluni appisimaartareerluni.
Nipilersoqatigiit appisimaaqatigiittarnertik sungiusimalluaraat nalunanngilaq, nipilersoqatigiillaqqeqaammi. Ulrik Skytte Andersen qatitoortuuvoq, Kristoffer Jul Reenberg pattattoq, Ayi Soloman tumerparpaartoq Jane Clarkilu angiartuulluni.
- Fynnimiusut erinarsuusiakka Rasmusip eqqartortuaannarpai. Ullutsinni aporfeeqqat ajornartorsiutillu nalaanneqartartut oqaasinngortittarneri.
Rasmus Lyberthip ilaquttanilu Odensimi najugaqarallaramik fynniumiusut erinarsuusiani suliarinikuusimavai. Sermersuup sukkavallaamik aakkiartornerata inuit ernummatigigaat Rasmus Lyberthip tusarnaartunut eqqaassutissiuppaa.
- Nipilersoqatikka inuusunnermik malinnaaniaannartariaqarpunga, Rasmus Lyberth erinaq nutaaq saqqummersinneqanngilaattaani oqarpoq.
Tusarnaartitsinermi Rasmus Lyberthip saqqummersinnikuusarpassui appisimaarneqarput. Juulliusiutit erinarsortartullu nuannarinerpaasai.
Jørgen Fleicherip taalliaa Takuat Paninnguaq Rasmus Lyberthimut isumalerujussuaq aamma atorneqarpoq.
Appisimaarneqartorpassuit ersaattaanneqareertullu tusarnaartitsineq naammassineqarpoq. Soorunami Rasmus Lyberth nipilersoqatinilu appeqqittaqattaarput tusarnaartut piumasaat naapertorlugu.
Juullimut tusarnaartitsinerit
Rasmus Lyberth nipilersoqatinilu juullimut tusarnaartitseqattaarlutik angalagaangata Christians Kirke Christianshavnimiittoq mininneqarneq ajorpoq. Aappaagu ukiut 20-torsiorlugit nalliuttorsiortoqassalluni.
Juullimi pilluaritsi
Rasmus Lyberth nipilersoqatinilu tusarnaartitsinerit marluk juullertinnagu suli angumerissavaat.
Rasmus Lyberthillu oqaasii kingulliit ukuupput:
- Juullimi pilluarujussuaritsi.
Allaaserip ataani assit takukkit