Odense
Assit takukkit: Rasmus Lyberth juullerpaluttumik tusarnaartitsisoq
Pingasunngormat unnukkut Rasmus Lyberth nipilersortunulu Odensemi juullerpaluttumik tusarnaartitsipput
Ukiuni kingullerni pisarnertut tusarnaartitsineq Nordatlantisk Husimi pivoq. Aammaarlunilu billetsit nungunneqarlutik. Tusarnaariat amerlasuut ukiuni siuliini tusarnaariartarsimasut ilaapput.
Juulleriartornerani pisoq uteqqiattutut amerlaqisut Rasmus Lyberth nipilersoqataalu tusarnaariartarnera ileqquliussimavaat.
Atuaruk: Rasmus Lyberth ukiumi erinarsuusiullammattut toqqarneqartoq
Juullerpalaarneq
Nipilersorfiup saavaniittorpassuit tusarusutartik tusarpaat. Rasmus Lyberth inuummareqaluni, peqqutissaqarluarlunilu isertuussinnaanngilaa pikkoreqisunik nipilersortartunik katersuutsitsinini tulluusimaarutigalugu.
Taakku nipilersortut sisamat, tumerparpaartoq Ayi Solomon, guitarertoq Alain Apaloo, qatitoortoq Ulrik Skytte Andersen, minnerunngitsumillu pattagiartoq Kristoffer Jul Reenberg Rasmus Lyberthimik tusarnaartitseqateqarnertik kialluunniit takusinnaavaa.
Sorpassuit qaffakaasutut ilertarput. Juullimi Qiimasuttut naggataarutaasutut Rasmus Lyberthimit aamma Kristoffer Jul Reenbergimit atorneqartoq tusarnaartut nikuillutik ersaattaatigaat.
Atuaruk: Rasmus Lyberth nipilersornermut nersornaatinut innersuunneqartoq
Isit matullugit
Erinnat atukkami akornisigut Rasmus Lyberth pisarnermisut oqaluttuallattaavoq. Inuunermi misigisarpassuit mianersortunnguami ullumikkut oqallisaasunik akusarlugit.
- Isit matuinnariarsigit, taava suna erinarsuutigineriga paasissavarsi, Rasmus Lyberthip siornatigut oqaatigereertakkani oqaatigaa.
Erinarsuutit nutaanngitsut atorneqarput, nutaallu ataasiakkaat. Ilaatigut erinarsuut nutaaq fynimut tunngasoq. Erinnarsuutit fynimut tunngasut Rasmus Lyberthip taalliarisimasai, ilaquttanilu Odensimi najugaqarnermini taalliarai. Nipilersoqatigiinnullu oqaaseqaat:
- Danmarkimi najugaqarluni nuanneqaaq. Nipilersullaqqissorsuit amerlaqaat. Ukiut ingerlanerini nipilersoqatigiit nipilersornerat nukittoriartuinnarnikuuvoq, tamannalu Rasmus Lyberthip nipaanut annertuumut tulluartuuvoq. Rasmus Lyberthip qanittukkut Danish Music Award Folksimi ukiup erinarsuusiullammaatut nersorneqarnera pissusissamisoorluinnarpoq.
Rasmus Lyberthip juullimut tusarnaartitsineri kingulliit
Juullertinnagu Rasmus Lyberth piffinni marlunni tusarnaarneqarsinnaavoq: Siullermik 13. december kisimiilluni Fjaltringimi tusarnaartitsissaaq, kiisalu 18. december, erinarsoqatigiit Umiaq peqatigalugit Odensimi Nordatlantisk Husimi Kalaallit Nunaannut Juullimut Inuulluaqqusinermut atatillugu tusarnaartitsissaaq.
Allaaserisap ataani assit takukkit