Skip to main content

Assit takukkit: Polar Explorers Day

Ole Jørgen Hammeken aamma Galya Morrell Sibiap ungasissortaanit oqaluttuaqqipput

Ruslandimi præsident Putin-ip siorna "Polar Explorers Day" eqquppaa, tamannalu pivoq maajip 21-anni, sovjet-russit issittumi stationeqarfiat 1937-imi ulloq taannarpiaq Qalasersuarmi pilersinneqarmat sulilerlunilu, soqutiginartumillu taanna qaammatit qulingiluat ingerlanerinnaanni Tunup kujasissuanut tissukarsimavoq, tassanilu russit ilisimasassarsiortut sisamat sovjetip umiarsuaanit sikunik aserorterummit ikineqarput.
Ulloq siunnersuutigineqarpoq Sikuiuitsumi Avannarlermi Kujallermilu nunani tamalaani suleqatigiinnermi præsidentip immikkut aallartitaanit, taannalu sivisuumik Ruslandip Sikuiuitsumi Avannarlermi Kujallermilu oqaasissaqarnersaatitaraa - aammalu 2009-mi Kalaallit Nunaat tikeraarsimavaa.
Kingorna Qalasersuarmiinneq Ishavet-imiinnerlu sovjet-russit pingaartitarilluarsimavaat, tassa 1937-imiilli Sjoet Unionip ajalusoornissaata tungaanut ukiut tamaasa sikumi issittumi stationeqartarsimagamik. Ukiut 12-t uninngareerluni stationeqarfik tissukartoq 2003-mi nangeqqinneqarpoq ullumikkullu suli ingerlanneqarluni.
Malluginiagassaavoq ilisimasassarsiorlutik angalasartut kisimik ulloq taanna nalliussiniarneqarneq ajormata, aammattaarli Ruslandip issittortaani najugallit, tamakkua amerlanerpaartaat issittumi nunap inoqqaaralugit.
Issittumi stationeqarfiit tissukartut saniatigut 1930-ikkunni 1940-ukkunnilu avannaarpiarsuani, pingaartumik Ishavet-ip sineriaani, nunami issittumi stationeqarfippassuarnik pilersitsiortortoqarpoq, Sovjet Unionili ajalusoormat tamakkua siullersaallutik sumiginnarneqarput amerlaqisullu qimavinneqarlutik.
Ukiunili kingullerni tamakku sanaqqinneqalerput, russillu kingusinnerpaamik 2020-mi tamatumani siuttuunetik angoqqinniarpaat.
Tamatuma saniatigut ukiuni arlalinni immikkut ittumik ilisimasassarsiorluni angalatitsisoqartarsimavoq, pissaaneqaqqillualersimasoq "Russian Geographical Society" illersuisoralugu.
2007/2008-mi misigisassarsiortartut Matvey Shparo aamma Boris Smolin, Ruslandip avannamut nuuanit Mys Arkticheskiy-mit Qalasersuaq tikippaat - decembarip 22-anniit marsip 14-iannut.
Ilisimasassarsiortut allat qimussimik Qalasersuarmit Canadap avannamut nuuanut Kap Columbia-mut ingerlapput. Pilersaarutaasimagaluarpoq ilisimasassarsiortut taakku Kalaallit Nunaata avannamut nuuanut Kap Morris Jesup-imut ingerlassasut, tassanngaanniillu Sermersuakkut Nunap Isuata eqqaanukarlutik. Russit ilisimasassarsiortut Nunatta avannamut nuuanut timmisartuunneqariarlutik ingerlaqqikkusussimapput, ataaserli arajutsisimavaat, tassa Namminersorlutik Oqartussanit akuersissummik peqqaartussaagamik - allaat taaneqareersup Chilingarov-ip nammineerluni Naalakkersuisut Siulittaasuannut Aleqa Hammondimut immikkut pineqarnissaminnik saaffiginninnera kinguneqanngilaq, rekordiliiniarnerlu maangaannarpoq.
Ilisimasassarsiornerit nalissaqanngitsut pingajuat Ishavet napillugu ingerlavoq Ruslandimit Qalasersuaq aqqusaarlugu Canadamut, qamutit motoorillit immikkut sanaat atorljugit.
Tamatuma saniatigut ukiuni kingullerni kattuffiup ajunngisaarniartup ´Adventure Clu Moscow´-ip Ruslandimi sumit tamanit inuusuttunut stationeqarfimmit tissukartumit Barneo-mit Qalasersuarmut ilisimasassarsiornerit aaqqissuullugillu ingerlattarsimavai - ukioq manna inuusuttut innarluutillit ilaatinneqarput, tamakkualu præsident Putin-imit nammineq ilassineqarput.
Ruslandip Issittumik samminninnera soorunami attuumassuteqarpoq ´Qalasersuarmik sorsuutiginninnermut´- Issittumi Siunnersuisoqatigiinni nunat ilaasortaasut allat assigilluinnarlugit.
Taamaattumik ´Polar Explorers Day´-p eqqunneqarnera qularnanngitsumik politikkimik tunngaveqaraluartoq russit siullersaallutik Issittoq immikkut nalliussivaat "professional holiday"-mik taaneqartumik, taannalu nunarujussuarmi tamarmi nalliussineqarpoq.
Sibiriap ungasissuani Yakutien-ip illoqarfiisa pingaarnersaanni Yakutsk-imi ulloq aamma nalliussineqarpoq Polar Star Hotel-imi, aaqqissuussisoralugit Association of Polar Explorers aamma ajunngitsuliornermik ingerlatsivik Arctic Lady.
Ole Jørgen Hammeken aamma Calya Morrell, illoqarfimmi tassaniittut, ´Cultural Expedition Avannaa´-ni peqataanertik pissutigalugu Kalaallit Nunaat pillugu oqalugiarnissaannut qaaqquneqarput.
Arctic Lady-p suliniutaa nersornartoq, Yakutien-ip issittortaani arnanik tapersersuineq, nersorniarlugu Yakutien-imi nunap immikkoortuinit assigiinngitsunit arnat assingi peqataatinneqarput.
 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER