tusarnaartitsineq
Assit takukkit: Nordisk Koncertkor tusarnaartitsillualaavissut
Erinarsoqatigiit poorskikkunni marloriarlutik Katuami tusarnaartitsipput, nuannarineqaqaallu
Erinarsoqatigiit Nordisk Koncertkor kulturikkut illorsuarmi Katuami Nuummi poorskikkunni tusarnaartitsipput.
Nipilersortartut Nunani Avannarlerneersut pitsaanersiugaallutik toqqakkat 22-t kisimiillutillu erinarsullammaat pingasut Nordisk Koncertkor peqatigalugu Nuummi nipilersukkanik tusarnaarumatuunik nuannisartitsipput.
Erinniarsuarnik arlalinnik katitigaasut atorneqarput, ilaatigut Charles Gounodip tusaqqoornartuliaa Sct. Cæciliemesse pingaarnerutillugu tusarnaartitsissutigineqarluni.
Erinarsoqatigiinni ilaasortat 40-t Bente Colding-Jørgensenimit siulersorneqarlutik ukiuni arlaqalersuni Nuummi sinerissamilu erinniarsuarnik erinnanillu tusaqqoornartunik allanik atuillutik tusarnaartitsisareerput.
Tusarnaartitsinermi kisimiillutik erinarsortut pingasut peqataapput. Arnartaraat qataanneq Signe Sneh Schreiber, qatitooq Teit Kanstrup kiisalu qatituup tullia Jan Lund.
Sermitsiaq.AG-mi assiliisup Leiff Josefsenip tusarnaartitsinermi assilisai ataani takuneqarsinnaapput