sungiusarneq
Assit takukkit: Mittarfiit qangarnisaanerusut atorneqaqqilersut
Kulusuup eqqaanniittoq Ikkatteq timmisartortartut sungiusarnerannut atussallugu tulluarpoq
Amerikarmiut mittarfigisimasaat artorunnaarnikut sakkutooqarfiup atortalerniarpai aappaagumit.
Timmisartup Night Hawk 2014-p misilittarneqarneranut atatillugu seniorsergenti Henrik Nicolajsen nalunaaruteqarpoq.
Henrik Nicolajsen Z-Teamimi pisortaavoq, timmisartullu C-130 Herculesit miffissaannik nunarsuarmi ujaasisartuullutik.
Sungiusarfissamut piummunnarluartoq
Suleqatini peqatigalugit Henrik Nicolajsenip Kulusuup eqqaaniittoq Ikkatteq aasaq takusarpaat. Mittarfik misissorneqareermat nalilerneqarpoq suli mittarfittut atorluarneqarsinnaasoq.
Sungiusarfigissallugu piukkunnarluartoq oqaatigaa.
- Mittarfimmut atorneqartumut qanittuaraavoq, Kangerlussuarmut akunneq ataasiinnaq aamma timmisartortoqarsinnaavoq. Mittarfinni sioralinnut miffigissallugu sungiusarfissatut piukkunnaateqarluarpoq. Timmisartoqarfiup sungiusartarfinngortinneqarnissaa aalajangiusimasorujussuuarput, Henrik Nicolajsen oqarpoq.
- Mittarfinni ajornarnerusuni danskit timmisartui mittartuusut ilisimaneqaatigaarput. Taamaattumik Kalaallit Nunaanni sungiusartalernissarput tulluarluarpoq. Soorunami Kulusummi mittarfik ajoqqusersornagu mittarfimmi sungiusartassaagut.
Mittarfik alla
Qeqertarsuatsiaat eqqaanniittoq aamma mittarfiusimasoq Marraq aamma soqutigineqarpoq. Tassani amerikarmiut mittarnikuupput. Taanna aamma takusarneqarnissaa siunnerfigineqarpoq.
- Mittarfiit amerlasuut miffigerusuppagut. Sungiusarnerinnaanavianngilaq, Kalaallit Nunaanni annaassiniartoqassagaluarpat aamma atorneqarsinnaassapput, nassuiaavoq.
Arctic Business Network aqqutigalugu allaaserisaq saqqummiunneqarpoq.
Assit ataani takukkit