kunngikkormiut
Assit takukkit: Kunngikkormiut Qullissat tikeraarpaat
Kunngikkormiut Qullissat illoqarfik aamarsuarsiorfiusimasoq tikeraarmassuk ippernaqaqaluni putserpoq
Kunngikkormiut helikopterimik marlunngornermi ullaap tungaani Qullissanut tikimmata inuit amerlanngitsut katerisimapput. Qaasuitsup Kommuniani kommunalbestyrelsemut ilaasortaq Bendt B. Kristiansen qaqortumik annoraalerluni paninilu mikisoq kalaallisoortoq, Arnannguaq Kristiansen sisamanik ukiulik naasunik dronningimut tunniussisussaq piareersimavoq.
Kunngikkormiut tikimmata anoreqanngilaq, qulisimalluni putsilaarpoq, taamaattumillu immamut ilulissanullu aamaruutissaqarfiusimasup avataaniittunut isikkiveqanngilaq. Qaqqat illoqarfiup qulaatungaaniittoq aamma pujornera peqqutigalugu takuneqarsinnaanngilaq, taamaallaat illut aserfallassimasut qernertunik igalaallik takussaapput. Illut ilaalli inoqarput qalipaqqammerlutillu, silataannilu manisanik nivingasoqarlutik aamma pujoorfii pujoorlutik.
Kisiannili ippernaqaqaaq, tamannali kunngikkormiut ajoqutigivallaartorsuunngilaat. Kunngikkormiut Kongevejenikkoorlutit ingerlaarput, unikkamillu Bendt B. Kristiansen tikilluaqqusilluni kalaallisut qallunaatullu oqalugiarpoq.
Taassuma kingorna Thorkild Jerimiassen Ilulissani Qullissat Ikinngutaani siulittaasoq kunngikkormiunut oqalugiarpoq. Oqalugiartoqareermat katersortarfimmut katersugaasivimmullu pisuttuarput, tassanilu assitoqqanik takutitsisoqarlunilu Qullissat oqaluttuassartaannik oqaluttuartoqarpoq.
Tikeraarneq qaannamik takutitsinermik naggaserneqarpoq, kunngikkormiullu sissamiit isiginnaarpaat. Kunngikkormiut Dannebrogimut sorsuutip gummibådianik ikaarunneqarput, timmisartumik uternissaannut putserpallaalernera peqqutigalugu.
Nalunaaqutaq pingasunut kunngikkormiut Saqqamut tikeraassapput, ilaatigut Saqqaq kulturi pillugu oqaluttuunneqassapput puisinniarnermillu takutitsivigineqarlutik.
Allaaserisap ataani assit takukkit