Kulusuk
Assit takukkit: Kulusummi meeqqat tamarmik tunissutisisut
Nunaqarfimmi meeqqat juullip inuanit ataasiinnarmiinngitsoq, marlunnilli tikeraarneqarput
Kulusummi meeqqat juullip inuinit marlunnit tikeraarneqarput, taakkualu Skakklubben Hrokurinn-imeersuullutillu Islandip Kalaallillu Nunaata ikinngutigiittut peqatigiiffiannit Kalak-meersuullutik.
Juullip inui decembarip 22-anni atuarfimmut pulaarmata meeqqanit nuannaaqisunit erinarsornermillu tikilluaqquneqarput.
Meeqqat tamarmik immikkut tunissutisipput, tunissutillu islandimi suliffeqarfimmit inuinnarnillu tunniunneqarsimapput.
Angalanerit arfinillit
Juullimi tikeraarnikkut malunnartinneqarpoq Hrokurinnip Kalak-llu ukiup suleqatigiiffiata suli ataatsip naanera. Peqatigiiffiit takkua marluk ukioq manna katillugit arfinileriarlutik Kalaallit Nunaannut angalatitsisarsimspput, angalasarnernilu aalajangersimasumik sammisarpaat skakkerneq, ikinngutigiinneq nuannaaqatgiinnerlu. Septembarimilu meeqqat Tunumiut qulissaa Islandimut angalapput, nalunnermik ilinniariartorlutik islandimilu inuiaqatigiit misigisaqarfigiartorlugit.
Air Iceland aningaasaliisuuvoq
Hrokurinnimut Kalak-mullu ilaasortat angalanerat Air Icelandip aningaasalersimavaa, taamatuttaarlu Air Iceland peqatigiiffiit Kalaallit Nunaanni sulineranni annerpaamik tapiissuteqartartuuvoq.
Islandimi ingerlatsivippassuit nuannaartitsinissamut aamma aningaasaliisimapput, ilaatigut Ikea, Toyota, Noi Sirius aamma Zo-On, tunissutissallu atisanik oqortunik ilaqarnissaannik isumaginnittuusimapput nuersaasartut klubbii aamma Reykjavikimi Røde Kors.
Atuartut soraarummeertussat 10. klassimi atuartut immikkut ipadsinik tunineqarput.
Kulusummi meeqqat atuarfianni atuartut 45-uupput meeqqallu qulit meeqqerivimmiillutik.
Pingasoriarluni
Skakkertartut klubbiat Hrokurinn ukioq manna katillugit pingasoriarluni Kulusummiittarsimavoq, skakkernerlu nunaqarfimmi nuannarineqartorujussuuvoq.
Juullimi tikeraartut tassaapput Hrafn Jökulsson, Stefan Herbertson, Robert Lagerman aamma Garpur I. Elisabetarson.
Atuarfiup pisortaata Justine Boassenip suleqataasalu juullip inui tikilluaqqulluarpaat, islandimillu tikeraat aamma tunissuteqarfigineqarput.
Unammiuaarnissat arlallit
Ukioq tulliuttoq Kalaallit Nunaanni skakkeqattaarfiulluassaaq. Januaarimi Toyota-skakfest Nuummi ingerlanneqassaaq, februaarimi unammiuaartitsineq Polar Pelagic Tasiilami eqqaanilu ingerlanneqassaaq. Poorskikkunni pisarnertut Ittoqqortoormiini marloriarluni skakkerdianik tikeraartoqassaaq, maajimilu unammiuaarneq Air Iceland-turnering Nuummi ingerlanneqassaaq. Tamatuma saniatigut Ilulissani Kangerlussuarmilu skakfestertitsinissaq sulissutigineqarpoq, taamatut paasissutissiivoq Hrokurinn.
Assit ataani takukkit