Nuuk Nordisk Kulturfestival
Assit takukkit: Kulturikkut pikialaartitsineq pisoqarfiulluartoq
Nuuk Nordisk Kulturfestival aterminut naapertuulluartumik eqqumiitsuliortunik nunatsinneersunik nunanillu avannarlerneersunik assigiinngitsorpassuarnik misigisassaqartitsivoq
Nuuk Nordisk Kulturfestivalip ulluisa aappassaat aamma assigiinngitsorpassuarnik misigisassaqarfiuvoq.
Sisamanngormat nunat avannarliit NUIF-imi pikialaartitsineranni nipilersortartut Sverigemeersut, Norgemeersut Islandimeersullu tusarnaartitsipput, kalaalerlu inuusuttoq taakkununnga qilanaarsaataalluni torrallaalluavippoq. Nuuk Centerimi The Embla nipilersorput, kalaallit peqatitaatik ilagalugit.
DJ islandimiu
NUIF-imi nunanit avannarlernit nipilersullammannut qilanaartuusiilluni guitarerluni erinarsorpoq inuussuttoq Jaaku Sørensen.
Tamatuma kingorna islandimiu DJ (Thorsteinn RDagnarsson), eqqumiitsuliortutut imminut taasoq DJ Stinsson, aliikkusersuivoq. Taannalu sivikitsuinnarmik kisimiilluni scenemiippoq. Siullermik norskip Poetry Slam/rappertartup Taro Vestøl Cooperip ilannguffigaa. Sivitsunngitsorlu kalaallit rappertartut nipilersortartullu tusarnaariarsimasut arlallit ilanngutsippaat.
Nuuk Posse
Immikkut tupaallatsitsilluni kalaaleq rappertartoq ilisimaneqarluartoq John Olsen (Nuuk Posse) takkuppoq rapperluavillunilu, tamannalu illu tamakkivillugu malugineqarsinnaavoq.
NUIF-imi tusarnaartitsinerani tassani suaartarnerit, nillianerit uinngiarsornerillu qoqernaannangajapput, inuit takkussimasut 100-t missaanniittut nuannersavissoqalutik.
Torrallavillugu rockertut
Rockertartut Sverigemeersut Beligate People, apriilimi Inussuk-festivalimi tusarnaartitsinissartik silarlunnera pissutigalugu taamaatiinnartariaqareersimallugu, rockimik nipilersornermik piginnaasaqarnertik takutippaat. Utaqqisariaqarsimanerallu peqqissimissutissaanngilaq. Tusarnaartunut 120-t missaanniittunut rockimik nipilersornermik tusarnaartitsineq nalissaqanngitsoq. Erinarsortartuat Anthon Anberi erinarsukkaminut immikkut illuinnartumik misigissuseqariaaseqarpoq, tusarnaartut tunorlerpaalluunniit misigisinnaaasaannik.
Torlussorneq
The Embla ippassaq Nuuk Centerimi inuppassualimmi, Varna aamma Hans Henrik ´HH´ Suersaq Poulsen aamma Peqatigiiffik Inngertatut peqatigalugit nuannivissumingaasiit tusarnaartitseqqipput. The Embla-kut erinarsuusiarpaalui atorneqarlutillu inngerutit ilisimaneqartut HH-mit, Varnamit aammalu Peqatigiiffik Inngertatut saqqummiunneqarput. Tusarnaartitsinermi pisoq nuannernerpaaq tassaavoq naassaanngipajaamik torlussornerit, kiinarpaap tunuaniittutut nipit peqatigiillu tivaqatigiinnerat, isiginnaartunit nuannarineqarluartumik.
Festivalimik aaqqissuussisuupput NAPA, Kommuneqarfik Sermersooq, NUIF, Katuaq, Nunatta Isiginnaartitsisarfia aamma Nunatta Atuagaateqarfia.