Katersugaasiviit kattuttut
Assit takukkit: Kangerlussuup Katersugaasivia matoqqajaasoq annaanneqarpoq
Kangerlussuup Katersugaasivia, Mittarfeqarfiit, illumik katersugaasiveqarfimmik piginnittup illu tunisariaqalermagu matuneqarnissaminik ulorianartorsiortoq, katersugaasiviit marluk kattunneqarnerisigut annaanneqarpoq
Ataasinngormat katersugaasiveqarnermi oqaluttuarisaanermik pingaarutilimmik pisoqarpoq, tassa Sisimiuni Kangerlussuarmilu katersugaasiviit kattummata.
Kattussinikkut Kangerlussuup Katersugaasivia matuneqaratarsinnaanerminit annaanneqarpoq, tassa Mittarfeqarfiit illumik katersugaasiveqarfimmik piginnittup illu tunisariaqalermagu. Kangerlussuup Katersugaasiviata pisortaa tusagassiorfinnut nalunaarutikkut taamatut allappoq.
Katersugaasivik 1997-imi pilersinneqarsimasoq maanna Qeqqata Kommuniata tiguvaa.
Sorsunnermit nillertumeersoq pingaarutilik
Illlu katersugaasiveqarfik aqqusaartunut akunnittarfittut sananeqarsimavoq, taamanikkut SAS Kangerlussuarmit Kangerlussuarmullu timmisartuussisalermat. Illu kingorna amerikarmiunit tiguneqarpoq, qullersaqarfittut atorneqarluni. Illumikkut init ilaat 1992-imi amerikarmiut taanna qimammassulli taamanikkut isikkorpiarmissut isikkoqarput, tamannalu pissutigalugu aamma illu taanna nalissaqanngilaq, katersugaasiviup pisortaa Christine Løventoft oqarpoq.
– Kalaallit Nunaata sorsunnerup nillertup nalaani, taamalu nunarsuup oqaluttuarisaanerani, inissisimasimanera, kalaallit oqaluttuarisaanerisa ilagaat pissanganartoq. Oqaluttuarisaanerup tamassuma Kangerlussuaq ilagaa, tassanngaanniit Sermersuarmi radareqaerfissuit, marluk Sermersuarmi inissisimasut, timmisartumik pilersorneqartarmata. Taamaasilluni Kangerlussuaq pingaarutilimmik inissisimasimavoq, sorsunnerullu nillertup attatiinnarneranut pisooqataasimalluni, Sisimiut Katersugaasiviani pisortaq Christine Løventoft tusagassiorfinnut nalunaarummi oqarpoq.
Kangerlussuup Katersugaasivia siunissami aaqqissuussaanikkut Sisimiut Katersugaasiviata ataaniissaaq. Kattunnikkut suleqatigiinnissat pissanganartut amerlasuut ammaanneqarput, tamatumuunakkullu Sisimiut Kangerlussuullu peqatigiinnerit nukittorsarneqassapput. Ataatsimut nittartagaqarneq, saqqummersitsinerit atuarfimmilu atortut katersugaasivinnut marlunnut taakkununnga iluaqutaasinnaapput.
Assit ataani takukkit