nuannanneq
Assit takukkit: Kalaallit Nunaat Tivolimi iluatsitsilluarfioqqippoq
Tivolimi ullut marluk nuannaarfiulluarput. Aaqqissuussaq ataasinngornermi naammassineqarpoq
Kalaallit Nunaat Tivolimi ataasinngormat unnukkut naammassilluarneqarpoq.
Ullut marluk ingerlanerini inuit 46.000-t naatsiivitoqaq iserfiginiarlugu aalajangerput, taakkunannga 15.000-t missaaniittut Kalaallit Nunaannut attuumassuteqartutut nalilerneqarpoq.
Kalaallit Nunaat Tivolimi aaqqissuussinermut aqutsisoq, Miki Jensen, aaqqissuussinerup ingerlanneqarnera naammagisimaartorujussuullugu tusagaassiuutinut nalunaarummi oqarpoq.
Atuaruk: Kalaallit Nunaat Tivolimit assit takukkit
Ukioq nalliuttorsiorfik
- Aaqqissuussaq eqqissisimasumik, nuannaarfiusumik, tusarnaartitsinernik pitsassuarnik ingerlanneqarpoq, aamma niueruteqartut naammagisimaarinnilluartut tusarparput, Miki Jensen oqarpoq.
- Ukioq manna annerusumik danskit tusagassiorfiinit soqutiginnittoqarpoq, ukiorlu nalliuttorsiorfiusoq ilanngutassiaraat. Suliniuteqartut anguniagaasa annersasa ilagaat, kalaallit kulturiannut ilisimasaqarnerulersitsinissaq. Tassunga tunngatillugu siammasissumik angusaqarpugut, taanna erseqqissaavoq.
Assit videolu takukkit: Tivolimi naapeqatigiinneq aallartilluaqaaq
Nuannersoruttorfik annertooq
Ullut marluk taakku ingerlanerini nipilersortartut ilisimaneqarluartut aammalu nutaat inuppassuit saavini Tivolimi Plænenimi tusarnaartitsipput.
- Erinarsoqatigiit poppimillu erinarsortut, meeqqat Uummannameersut pikkorissut, nipilersoqatigiit inuusuttut tamanik tupaallatsitsisut, inuit kalattoortut.
- Da Bartali Crew tusarnaartitsineranni Lars Nuuk Possemeersup appeqataanera, aammalu pingaarnertut Ole Kristiansenip tusarnaartitsinera. Ullut taakku nalliuttorsiornerup nuannersoruttorfigai, aaqqissuussinermut aqutsisoq oqarpoq.
Atuaruk: Kalaallit Nunaat Tivolimit assit amerlanerusut takukkit
Iluanaaruterujussuaq
Miki Jensenip tamatuma saniatigut erseqqissaatigaa, Kalaallit Nunaat Tivolimi aaqqissuunneqartarnera Nunatsinnut aamma kalaallit kulturiannut iluanaaruterujussuusoq.
- Ukiut tamaasa ataatsimut atinik nutaanik aamma iliuuseqaraangatta kulturikkut annertuumik malunniuteqartarpoq, inuppassuarnillu nuannaarutigineqartarluni. Aaqqissuussap angusaqarluartarnera attatiinnarneqassappat, aningaasaateqarfiit sponsorillu nipilersortut suliniullu tapersertaannarnissaa pisariaqarpoq, Miki Jensen oqarpoq.
Uani ataani assit takukkit