tusarnaartitsineq
Assit takukkit: Kalaallit meerartaat ikiorniarlugit Julie Berthelsen erinarsorpoq
Tallimanngormat unnukkut Odensemi Ansgars Kirke-mi Nanu Børn-imik tapersersuiniarluni kusanartumik tusarnaartitsisoqarpoq
Tusarnaartitsineq aaqqissuunneqarsimavoq Ladies Circle-mit, Round Table-p arnartaanit. Julie Berthelsen tusarnaartitsilluaqaaq. Ansgard Kirke-mi tusarnaariat 300-t missaanniittut misigisaqartilluarneqarput.
Julie Berthelsenip erinarsukkat pisoqqat nutaallu erinarsorpai. Julie Berthelsen tusarnaarpaat kalaallisut, qallunaatut tuluttullu erinarsortoq. Minnerunngitsumillu tusarnaarpaat Julie Berthelsenip suliniut Nanu Børn, Kalaallit Nunaanni 2008-miilli meeqqanik, inuusuttunik ilaqutaannillu atugarliortunik tapersersuinermik suliniuteqarsimasoq. Ersaartaattarluarmallu qularutissaanngilaq Julie Berthelsen nuannisartitseqisoq - minnerunngitsumik angummi Per Berthelsenip erinarsuusiaanik atuigaangat.
Nanu Børn-imut ambassadøri
Julie Berthelsen, Nanu Børn-imut ambassadøriusoq, ilaatigut oqarpoq:
– Nanu Børn Kalaallit Nunaanni pingasunik ornittagaaateqarpoq. Sisamassaaq upernaaru atulissaaq. Nanu Børn-ip meeqqat 4-niit 14-inut ukiullit toqqissisimanermik, kialaarnermik, assanninnermik, nerisassanik imigassamillu atorfissaqartitsisut piumassutsimik sulinik sullitarai, Julie Berthelsen oqarpoq nangillunilu:
– Inuit tamakkua taama annertutigisumik sulisut ataqqisorujussuuvakka, nalunngilaralu anigaasat, Ladies Circle-p maani tusarnaartitsinermi isertitai iluaqutaasorujussuussasut, Julie Berthelsen oqaluttuarpoq.
Ladies Circle
Julie Berthelsenimik tusarnaartitsinermik aaqqissuussisut naatsorsuutigaat naatsorsuutit kisinneqareerpata Nanu Børn-imut isertitat 20.000 koruunit missaanniissasut. Sulili amerlanerusunik takkuttoqassaaq. Fynimi Ladies Circle-p nunap immikkoortuani siulittaasua rikke Tandrup Sermitsiaq.AG-mut oqaluttuartpoq Ladies Circle-p Nanu Børn 2014-2016-imut nuna tamakkerlugu katersuiniutissagaa. Rikke Tandrup nangilluni oqaluttuarpoq:
– Ladies Circle Nuummi maajip 8-annit 10-annut ataatsimeersuassaaq, tassanilu ukiumi siullermi katersat Nanu Børn-imut tunniunneqassapput, Aningaasat katersorneqartut sunut, sammisaqartitsinermi assigiinngitsunut atorneqarsinnaasunut pisinermut atorneqassapput.
Danmarkimi Ladies Circle-mi ilaasortat 1500-t missaanniipput. Rikke Tandrupip taavai Kvindepower-itut.
Assit ataani takukkit