Amerikap Nunavissuani pissartanngorniunneq
Assit takukkit: Kalaallit ajugaarujussuarput
Amerikap Nunavissuani pissartanngorniunnermi unnamminerup kingulliup tulliani ilimagineqartutut kalaallit Guatemala-mut ajugaapput
Minutsit sisamat ingerlareersut kalaallit 5-1-imik siuarput. Minutsit 15-it ingerlareersut 14-8-mik siuarput unamminerlu aalajangerneqapajaareerpoq. Muminnermi kalaallit 25-12-mik siuaqqapput. Unamminerup immikkoortuata aappaani siuariartorneq ingerlaqqipoq, dommerilluy argentinamiut naggataamik siggarmata Estadio Sergio Matto-mi qiianartumi inoqarpianngitsumilu kalaallit 44-23-mik ajugaapput. Kalaallit Guatemala-mut unamminerat ilutigalugu Uruguay-p arsaattartui Brasiliami nunarsuarmi pissartanngorniunnermi Columbia-mut unammipput. Arfininngormat unnukkut Montevideo-mi aqqusinerni nuannattoqanngilaq. Columbia 2-0-mik ajugaavoq. Estadio Sergio Matto-mi isiginnaartup ataatsip Sermitsiaq.AG-p oqaloqatigisaata ersarissumik oqaatigaa:
– Uagutsinnut Uruguay-erminut arsaanneq pingaarnersaavoq.
Kisitsisitigut takussutissat
Kalaallit Nunaata siullermeersumik Guatemala assammik arsarluni unammivaa, kisitsisitigullu takussutissat qiviarutsigik Kalaallit Nunaata Guatemala naalagaaffiit unammisimsaasa 36-issaraat. Rasmus Larsen nunanut 36-inut tamanut unammeqataasarsimavoq. Tassami Rasmus Larsen Kalaallit Nunaata nunanut allanut unammisarnerini tamani peqataasarsimavoq, 1997-imi Kalaallit Nunaat Det Internationale Håndboldforbund-imut ilaasortanngormalli, nunatut assammik arsartartutut namminersortutut.
Unammerlaat qapertarpaat
Ileqqutoqaq, tassa nunanut allanut unamminermi peqataarngaartut qaperneqartarnerat, suli atugaavoq. Tamaattumik Patrick Frederiksen, Gustav Ostermann Egede aamma Isak Olsen qapertissimallutik unammipput.
Unammisartut tamarmik, målmandit kisimik pinnatik, isertitsipput. Nalinginnaasumik unammerpiarneq ajortut unammitinneqarluarput, tamarmillu isertirtsipput. Inuk Olsenimut ulloq nalliussiffiuvoq. Siullermeersumik nunamut allamut unamminermi isertitsivoq.
Kalaallit isertitsisui
Akutaaneq Kreutzmann 9
Danny Brandt 6
Johannes Groth 6
Eqalunnguaq Kristiansen 5
Angutimmarik Kreutzmann 4
Aqqalu Ingemann 4
Nuka Heilmann 3
Gustav Ostermann Egede 3
Rasmus Larsen 2
Inuk Olsen 2
Kalaallit ullumi USA unammissavaat normu 5-inngorniullutik. Unammineq aallartissaaq tasamani nalunaaqutaq 16.00 (kitaani nalunaaqutaq 17.00), tamannalu sioqqullugu Guatemala Mexicolu normu 7-inngorniutissapput. Uruguay aamma Chile bronze-nanniutissapput, finalimilu unammissapput Argentina aamma Brasilien.
Chile-p Uruguay-mut ajugaanissaa ilimagineqarpoq, taamaassappallu Argentina, Brasilien Chile-lu nunarsuarmi pissartanngorniunnissamut anngutissapput.