Kujalleq
Assit takukkit: Innuttaasunik ataatsimiititsinermi apeqqarissaarluartut
Naalakkersuisut Qaqortumi innuttaasunik ataatsimiititsineranni siunissami angallannerup aaqqissuussaanera inissiallu nutarterneqarnissaat ilaatigut sammineqarput
Suliffissaaleqineq akiorniarlugu suliniuteqarneq.
Inissiat nutarterneqarnissaannut pilersaarut.
Mittarfeqarnermullu takorluukkat.
Amerlasuut sammineqarput
Sammineqartut amerlaqaat Naalakkersuisut siulittaasuat Kim Kielsen (S) aamma Ineqarnermut, Sanaartornermut Attaveqarnermullu Naalakkersuisoq Knud Kristiansen (A), borgmester Jørgen Wæver Johansen (S) peqatigalugu, sapaatip akunnerani siusinnerusukkut Qaqortumi innuttaasunik ataatsimiititsimmata.
Nutarterineq
Ataatsimiinnermi ilaatigut oqaatigineqarpoq Namminersorlutik Oqartussat Kommune Kujallermi inissiaatitik tamaasa misissuleruttoraat, siunertaasorlu inissiaqarfinnut tamanut nutarterinissamut pilersaarusiornissaq.
Pilersaarutikkut attartortut takusinnaassavaat nammineq inissiartik qanoq pineqassanersoq, taamatuttaarlu pilersaarutikkut A/S Inissiaatileqatigiiffik INI-p takusinnaalissavaa nutarterinissamut pisariaqartitsineq aserfallatsaaliinermullu aningaasartuutit amerlassusissaat.
Nanortalik
Taamaasilluni assersuutigalugu Nanortalimmi Namminersorlutik Oqartussat inissiaataasa ukiuni aggersuni nutarterneqarnissaannut iluarsaanneqarnissaannullu 19,2 millioner koruunit immikkoortinneqarsimapput.
Inissianut suliniuteqarneq illoqarfinni ataasiakkaani immikkoortunut pilersaarutinut qanimut atassuteqarpoq. Nanortalillu eqqarsaatigalugu assersuutigalugu takuneqarsinnaavoq illoqarfimmi inissiat inoqanngitsut amerlavallaartut, taamaasillunilu inissiaqarfiit sisamat katillugit 57-inik inissiartallit iluarsaanneqassapput.
Umiarsualiviit
Tamatuma saniatigut umiarsualiviit arlallit nutarterneqassapput, pilersaarullu malillugu suliaq tamanna ukioq manna aallartinneqassaaq.
Suliniutikkut ilaatigut Qaqortumi umiarsuarnut takornariartaatinut talittarfik pitsanngorsarneqassaaq.
Mittarfiit
Mittarfeqarneq eqqarsaatigalugu Naalakkersuisut ilaatigut naatsorsuutigaat Qaqortumi mittarfissaq 1.499 meterinik takissusilik ukioq manna pilersaarusiorneqalissasoq, ilaatigullu aamma siunertaalluni timmisartunut amerlanerpaamik 19-inik issimasoqarsinnaasunut mittarfiit naatsut arlallit pilersaarusiorneqalissasut. Mittarfiit taamaattut pilersinneqarsinnaapput Narsami, Nanortalimmi Alluitsup Paanilu.