innarluutillit
Assit takukkit: Innarluutilinnut immikkoortoqarfik nutaaq
Inersimasut paaqqutarisariaqartut Ippiarsummi inissaqalerput
Tallimanngormat juunip 12-anni utoqqaat najugaqarfianni Ippiarsummi innuttaasunut timikkkut innarluutilinnut inuusunnerusunut immikkoortoqarfik nutaarluinnaq 12-nik inissalik, kiisalu paaqqutarisanut init nutaat 12-t atoqqaarfissiorneqarput.
Timimikkut innarluutilinnut, suli utoqqalinersiaqalersimanngitsunut, illoqarfimmi angerlarsimaffianni naleqquttunik neqerooruteqannginnera pissutigalugu inersimasut paarineqartariallit kommunip avataanut inissinneqartariaqartarsimapput.
Nutaamik immikkoortoqalerneratigut Nuummiut sisamat, namminneq ilaqutaasalu kissaatigisaat malillugu, angerlarsinnaalerput, utoqqaat illuini utoqqaanerusut najugaqatigisariaarullugit. Illuli najugaqarfik taannaavoq, utoqqaanerusunillu peqateqartarnissamut periarfissaqarpoq. Neriuutigineqarpoq inuusunnerusut utoqqaanerusullu tamanna iluaqutigisinnaassagaat.
Innarluutilinnut inuusunnerusunut immikkoortoqarfik nutaaq maanna najugaqartut ataatsimut, pingaartumillu ataasiakkaat, pisariaqartitaannut piginnaasaannullu aaqqissuunneqalerpoq.
Paaqqutarisassanut inissiat nutaat 12-it pissutigalugit Kommuneqarfik Sermersuup Nuummi utoqqaat utaqqisut allattorsimaffiat iliuuseqarfigaa, puigortunngorsimasunullu inissanik pissaqalerluni.
Atoqqaarfissiortitsinermi oqalugiarput borgmester Asii Chemnitz Nareup aammalu Tangiuinermut, Sulisartoqarnermut Inuussutisarsiornermullu Ataatsimiititaliami siulittaasoq Malene Lynge, kiisalu ilaqutariissutsimut, naligiissitaanermut isumaginninnermullu Naalakkersuisoq Martha Lund Olsen.