Assit takukkit: Imminut toquttarneq pillugu paqumigisanik allanngortitsisoq

Imminut toqunnissamik eqqarsaateqaruit ikiortissaqarputit. Ikorfartorneqarnissamilli pisariaqartitsinerup nipituumik erseqqissumillu oqaatiginissaa pisariaqarpoq.

Taama Karen Berthelsenip septembarip 10-ani FN-ip imminut toquttarneq pinaveersaartinniarlugu ullorititaani Nuummi illoqarfiup qeqqani ullormik malunnartitsiniartup oqariartuutaa inuunermik uppernaasaatoq nipeqarpoq.

Paquminartoq allanngortissiuk

Issini asserlugit trussiinnaqarluni iviangequtaannaqarlunilu sassarterpoq. Imminullu toquttoqartarnera pillugu paqumigisat allanngortinniarlugit sanioqquttut taassuma timaani tuschi atorlugu uummammik imaluunniit uniffik annermik titartaasinnaapput. Uummat immini oqariartuuteqartoq uniffik anneq inunnut ilaatigu imminut toqunnissamik eqqarsaatinik akiorniagassaqartunut neriuutissaqarnermut assersuutaavoq.

Karen Berthelsen allagartarsualiani atorlugit ullumikkut qanoq iluatsitsisimatiginerminik erseqqissaateqarpoq. 2007-imi imminut toqoriarsimagaluarpoq ikiorneqarlunili, pisariaqartitsileraangamilu tusarnaarsinnaasunik ilaqutaqarnerminik ikinnguteqarnerminillu pilluaatiginnilluni.

Sassarterneq

Karen Berthelsen Sermitsiaq.AG-mut oqarpoq, taamatut pisoqartitsinissaq aalajangiussimagini arnaq nerinissamik ajornartorsiuteqartoq Londonimi assingusumik iliuuseqartoq Youtubemi takoreerlugu.

- Sassarternissaq oqaluttuassartannillu oqaluttuarinninnissaq sivisuumik eqqarsaatigisarsimavara. Tamakkua nipituumik oqaatiginissaat pingaaruteqarpoq, maani imminut toquttarneq atugaaqimmat. Maannamullu ajunngitsuinnarmik qisuariarfigineqarpunga, Karen Berthelsen oqaluttuarpoq.

Sassarternissamik aalajangiussivippoq Namminersorlutik Oqartussat ulloqartitsinermut atatillugu ingerlatanut taamaallaat 28.000 koruuninik agguaassisimanerat takugamiuk.

- Taava sassarternissamut sapiissuseq kingulleq qaffatsippara, Karen Berthelsen oqarpoq.

Aamma atuaruk: Doris: Alt for mange begår selvmord