Danmark
Assit takukkit: Ilinniagaqartut Christiansborgimi
Ilinniagaqartut nutaat 14-it oqartussaaqataanerup maskiinaqarfiani, Christiansborgimi, takornariartinneqarput
Assigiinngitsorpassuarnik ilinniagaqarniat 14-it takkupput, Københavnimi Kalaallit Illuutaat sapaatip akunnerani kingullermi Danmarkimi innuttaasunik nutaanik Kalaallit Nunaanneersunik, ilinniagaqariartorlutik tikissimasunik, tikilluaqqusilluni aaqqissuussimmat.
Aaqqissuussaq taanna ilaatigut oqartussaaqataaffiup qullersaqarfiani, Christiansborgimi, ingerlanneqarpoq.
Ilinniartunik takornariartitsipput Siumup allattaa Miki Jensen, aammalu IA-mi studentermedhjælperi Aviâja Jepsen.
Folketingimut ilaasortanngoqqammersut Aaja Chemnitz Larsenip, IA, Aleqa Hammondillu, Siumut, ajoraluartumik ilinniagaqartut tikilluaqqusinnaasimanngilaat.
Qalipaat aappalaartoq
Anders Fogh Rasmussen Christiansborgimi qanga qalipaammik aappalaartumik kuineqarmalli Borgenimut pulaartunik isumannaatsuunermik misissuineq annertuumik annertusineqarsimasoq. Tamanna pissutigalugu pulaartut tamarmik aningaasat kaasarfimmiutik qaqittassavaat, qitequtitik peertassallugit, mobiltelefonit il.il. qaqittassallugit, Christiansborgimut isertinneqannginnerminni. Ukiassakkut ulloq taanna alianaaqisoq illussaarsuarmi susoqarpasippallaanngilaq, qaqutigoortumilli Siumup IA-llu allaffii takuniarneqarsinnaasimapput.
Assigiinngeqisunik ilinniagallit
Aaqqissuussinermi peqataasut assigiinngitsorpassuarnik ilinniagaqarput. Ingeniørinngorniat, inuussutissarsiornermi ilinniakkanik ilinniagaqartut, DAC-mik ilinniagaqartut universitetimilu assigiinngeqisunik, soorlu eskimologi-mik, matematik-imik tarnillu pissusianik ilinniagaqartut. Ilinniagaqartut aamma ukioqqortussutsimikkut nikingasorujussuupput. Ataatsip panini pingasunik ukiulik ilagaa, taassumalu Christiansborgimi majuartarfippassuit torsuusarsuillu sangujoraartut sapersaatiginagit ingerlavai. Taanna takornariaqataasuni nukarlersaavoq, tamatumalu saniatigut anaanaqarpoq inuusuttuaqqamik panilimmik aammalu angutit arnallu arlallit ukioqqortusilaarsimasut.
Usuup puua qorsuk
Aviâja Jepsenip Miki Jensenillu illorsuarmi qalipagaatit pinnersaatillu amerlasoorsuit pillugit pissanganartunik nuannersunillu oqaluttuarput. Assersuutigalugu Anders Fogh Rasmussenimik qalipagaq, eqqumiitsuliortumit siusinnerusukkullu saamerlerni akerliliiniartartumit Simone Aaberg Kærnimit qalipanneqarsimasoq, taaneqarpoq Anders Fogh Rasmussenip 2004-mi Årets Laks-itut toqqarneqarneranut innersuussutaasutut, taanna usuup puuanik qorsummik paasiuminaallisakkamik ilaqartoq. Qalipallugulu assilineqarnera filmip Die Hard 2-p plakatianut assingusorujussuuvoq.
Imminut avammut igissimavoq
Kalaallit Nunaanneersumik angisoorsuarmik kusanartumik qalipagaqarpoq Kai Rasmussenimit qalipanneqarsimasumik, taannalu assiliiviit atulinnginneranni suliassiissutitut qalipassimavaa. Miki Jensen naapertorlugu qalipaasoq taanna ima umiarlulersimatigaaq, imminut avammut igissimalluni taamalu imminut toqulluni.
Majuartarfippassuit, torsuusaaqqat torsuusarsuillu aqqusaajortorneqarput. Elevatorit immikkoortitat paternosterinillu taaneqartartut isumannaatsuuneq pissutigalugu taamaallaat folketingimut ilaasortaannarnit tassanilu sulisunit atorneqarsinnaapput. Folketingip ataatsimiittarfia inoqanngilluinnarpoq. Takuneqarsinnaavorlu qalipaat aappalaartoq, ministeriusimasumut Anders Fogh Rasmussenimut taamani kuineqartoq tamavimmi peerneqarsimanngitsoq. Naggataatigut pulaartut illussaarsuup qaavani aneersuartarfimmiipput illoqarfimmut tamarmut isikkiviginneqarpaajugunartumi.
Takornariartitsinermit assit ataani takukkit