assammik arsarneq
Assit takukkit: GSS QNA-lu naligeeqisut
Brugseni JuleCupimi GSS-imut finalernermi Minik Dahl Høeghip piginnaassutsini takutippaa
Angutit assammik arsartartut unammiuaarneranni Brugseni JuleCupimi assammik arsartartut klubbiata QNA-p GSS-imut finalimi unamminermini Minik Dahl Høegh aamma Hans Karl Berthelsen iluaqutigilluarpai.
Finali marlunngormat unnukkut Nuummi ingerlanneqarpoq.
Perrassaaserput
Unammiuaarnermi rundimi siullermi GSS-ip QNA 36 -36-mik ajugaaffiginikuuvaa. Finalimili unamminissaq sioqqullugu QNA unammillammannik perrassaasersimammat unammineq naligiinnerujussuuvoq.
QNA-p unammisorai unammisartut Nunatsinnit Danmarkimillu katitikkat, Nuummi klubbinit ilallit.
Tamaviaaqisut
Unammineq sakkortoqaaq tamaviaarfioqalunilu. Holdit tamarmik ajugaarusupput, malunnarluinnarporlu ajugaaniarlutik tamarmik suut tamaasa atorusukkaat.
Unammineq naligiiffiusorujussuuvoq, holdillu marluullutik minutsini siullerni 50-ini sinnersaraallutik siuaqqasarput.
Piginnaanini takutippaa
Unamminerup naajartulernerani Minik Dahl Høghip assersuinermi saassussinermilu piginnaasaqarluarnini takutippaa.
Saassissinermi akeqqanit unguneqartarpoq, taamaasillunilu allat periarfissittarlugit - nammineq isertitsinngikkaangami.
Tamanna peqatigalugu GSS-ermiut måliniilluaqisoq Isak Olsen isertitsivigiuminaatsippaat. Naggataatigullu QNA 39 - 33-mik ajugaavoq.
Pissanganannginnerit
Arnat unamminerat pissanganartorsiorfiunnginneruvoq.
GSS ilimagineqarnersaavoq pakatsisitsinngilarlu. Brugseni JuleCupimi finalernermi QNA sapersaatiginagu 35 - 19-imik ajugaaffigaat.