Skip to main content

Assit takukkit: GOG-mi unammisartut bronzenakkamik nuannaaqaat

Medaljenakkusuppunga, sapaatip akunnerpaaluisa matuma siornatigut Akutaaneq Kreutzmann Sermitsiaq.AG-mut oqarpoq. Sinnattu tamanna arfininngormat piviusunngorpoq

Sapaatiummat GOG-p, GOG Arenami KIF Kolding København målinik tallimanik amerlanerusunik isertitsilluni ajugaaffigaa.

Arfininngormat Koldingimi Sydbank Arenami unamminerup aappaani 2.672-inik isiginnaartulimmi GOG 29-26-mik ajorsarpoq. Unamminerit taakkua marluk katinneranni GOG målinik marlunnik amerlanerusunik isertitsilluni ajugaavoq.

GOG-mi nuannanneq

Minut 30-t marloriarlugit unammerteernermi KIF Kolding Københavnermiut pakatsisimaqaat, unamminerup immikkoortuata aappaani GOG angusarluaraluaramikku. Tamannali naammanngilaq.

Taarsiullugu takuvaat GOG-mi unammisartut sungaartunik tuluujuarallit unammisarfik kaajallallugu nuannaaqalutik arpaqattaartut illersortiminnit angalaqataasimasunit nuannarineqaqisumik. Tamakkua amerlanerpaartaat sungaartunik atorput. Minnerunngitsumillu GOG-p unammisartui bronzemik ujamilerneqarmata tipaatsunneq naassaanngilaq.

Sinnattu piviusunngorpoq

Medaljenakkusuppunga, sapaatip akunnerpaaluisa matuma siornatigut Akutaaneq Kreutzmann Sermitsiaq.AG-mut oqarpoq.

Sinnattua piviusunngorpoq Akutaaneq Kreutzmann bronzemik ujamilerneqarmat. Unammisartunut ataasiakkaanut, sungiusaasunut inunnullu holdimik isumaginnittunut angusaq angisooq, illersorterpassuarnut aalajaatsunut aningaasaliisunullu angusaq angisooq, minnerunngitsumillu klubbimut tamarmut angusaq angisooq.

GOG 2008-mi sølvinnannikuuvoq. 2010-mi akiliisinnaajunnaarluni. 2. divisionimit aallaqqaataanit aallarteqqilluni. Maannalu Danmarkimi assammik arsartartuni siuttunut ilanngulluni.

Angusarissaarnerullu akissarsiassartaraa GOG sæsonip tulliani europami assammik arsarluni unammiuaarnermi peqataanissaa.

Tamaviaarnaqaaq

Unamminermi GOG aallartilluarpoq. Arsaq sukkasuumik ingerlattarpaat. Assersuisut assersuilluarput målinilu Espen Christensen annaassilluartarpoq. GOG 2-5-imik 2-6-imillu siuarpoq.

Minutsit qulit ingerlariiginnartut KIF Kolding Københavnip sungiusaasuata Carlos Ortegap timeoutkorti siullermeerluni tunniuppaa. GOG siuarsimajuarsinnarpoq 8-10-mik, 9-11-mik, 10-11-mik, 11-11-mik, 11-12-imillu.

Angerlarsimaffimminni unammisartut målianni Kasper Hvidt pisarnermisut unammilluartorujussuuvoq. GOG-mi unammisartuisa pinngitsooratik isertitassaralui arlallit Kasper Hvidtip annaattarpai.

Unammisarfimminni unammisut 14-12-mik siuarput, Minik Dahl Høeghilu unammilluartorujussuaq unamminerup immikkoortuata siullerlup inerneranut 14-13-imut isertitsivoq.

Unamminerup immikkoortuata aappaa

Pissanganarpallaaleraluarpoq. Minutsit siulliit tallimat GOG malinnaalluarpoq. Taavali KIF Kolding København siuariartulerpoq. 18-16, 19-16, 20-16. Unamminermit siullermit GOG-p isertitanik tallimanik siuarsimanera ataasiinnanngorpoq. Unamminerup immikkoortuata aappaata qiteqqunnerani KIF Kolding København 24-19-imik siuarpoq. Tassa unamminerit marluk katikkaanni naligiilluinnalerlutik.

Minutsit arfineq-pingasut sinneruttut akeraat 26-22-mik siuarsimapput. Unammiffik tamaat meterit tamaviisa akiuuttoqarpoq. Minik Dahl Høegh aamma Akutaaneq Kreutzmann arlaleriarlutik torrallaasarput. Ilaatigut Akutaaneq Kreutzmannip unammisarfik naavillugu Henrik Jakobsen stregimiittoq tunivaa.

Naggatissaa tikillugu pissanganaqisoq

Unammineq assammik arsarnermik takutitsilluarneruvoq. Minik Dahl Høegh slutspillimi unamminerni allanisut tamaviaarluartorujussuuvoq. Akisussaaffimmik tigusivoq piffissallu ilaanni pingaarutilerujussuarnik isertitsisarluni, GOG tatineqarnerpaagaangat. Minutsit pingasuinnaat sinneruttut 28-25-mik inissisimapput.

Unamminermi qanorluunniit pisoqarsinnaavoq.

GOG-mut qujanartumik Lars hald 28-26-imut isertitsivoq. KIF Kolding København ataasiinnarmik isertitseqqippoq, bronzennniunnermilu unammineq pissanganaqisoq 29-26-mik inerneqarpoq. Unamminermit siullermit GOG-p målinik tallimanik siuarsimanera anguneqanngitsoorpoq.

Kalaallit unammilluaqisut

Unammisarnerit siuliinisut Minik Dahl Høegh Akutaaneq Kreutzmannilu unammilluaqaat. Minik Dahl Høeghilu arfineq-pingasunik isertitsilluni GOG-mi isertitsinersaaqqippoq.

Akutaaneq Kreutzmann ataatsimik isertitsivoq. Sungiusaasoq Jakob Larsen unammineq tamaat eqqissisimavoq puullaaqilissananilu, allaat unamminerup immikkoortuata aappaani, fynimiut tatineqarnerpaaleraluallarmata.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER