Skip to main content

Assit takukkit: GOG akiluulluaraluarluni ajorsarpoq

Semifinalimi unamminerit aappaanni Team Tvis Holstebrop GOG ajugaaffigeqqippaa

Håndboldligami medaljenanniulluni naggataamik unamminerit tamarmik ussanneqarluartarput.

Arfininngormat ualikkut Holstebromi unammisarfissuarmi Gråkjær Arenami Team Tvis Holstebro-p GOG-llu aappassaanik unamminerat aamma taamaappoq.

Billetsit 3.100-t

Pingasunngormat GOG Arenami unamminermi siullermi GOG 27 - 28-mik ajorsarpoq. Unamminerup aallartinnissaa akunnermik ataatsimik sioqqullugu billetsit 3.100-t tunineqarsimapput. Nikorfallluni inissat qulit sinnerussimapput.

Unamminerup immikkoortua siulleq

GOG aallartinnerluppoq. Unammisartut annilaangarpasipput. Minutsit aappaata affaa ingerlariiginnartut angerlarsimaffimminni unammisut 3 - 0-mik siuareerput.

GOG-p sungiusaasua Jakob Larsen minutsit pingasuinnaat ingerlareersut timeout-erpoq. Team Tvis Holstebro sakkortuumik unammivoq assersuilluaqalunilu. GOG-p isertitseriallaqqissortai Minik Dahl Høegh Andreas Holst Jensenilu paarineqarluarput.

Ajoqusertut

Siullermik Minik Dahl Høegh sakkortuuliorfigineqarluni ajoqusitsiarpoq bæknimilu qasuersilaarluni. 5 - 2-mik inissimasut Andreas Holst Jensen aamma ajoquserpoq unammiffimmillu kivillugu anninneqarluni. Taanna unamminermut uteqqinngilaq.

Aatsaat sapaatiuppat MR scanningerneqareerpat ajoqusernera qanoq annertutiginersoq paasineqarsinnaavoq. Andreas Holst Jensen peqataajunnaarmat fynimiut suli annilaangarpasinnerulerput. 10 - 7, 11 - 7, 12 - 7, 13 - 7 aamma 14 - 7-imut isertitsipput, aatsaallu taamaasereersoq Minik Dahl Høegh 14 - 8-mut isertitsivoq.

Tamatuma kingorna GOG-mi anisitaanermik eqqorneqarpoq. Tamanna ajornannginnerulersitsinngilaq. 18 - 10-mut isertitsisoqareersoq Akutaaneq Kreutzmann siullermeersumik isertitsivoq 18 - 11-mut isertitsilluni. Muminnermi Team Tvis Holstebro 19 - 12-mik siuaqqavoq.

Immikkoortup aappaani ingerlalluarnerupput

Unamminerup immikkoortuata aappa siullertut aallartippoq. Angerlarsimaffimminniittut siuariartorput 20 - 12-imut 21 12-imullu, aatsaallu taamaasinerani GOG isertitseqqittalerpoq.

Minik Dahl Høegh sisamanik isertitsilluni angusaatitsivoq. Minik Dahl Høeghilu 21 - 16-imut isertitsigami arfinilissaa isertitsivoq.

Angussanerpaat?

Ilumut unammineq mumikkiartulerpa? Fynimiunut ajoraluarlutik Team Tvis Holstebrop målmandia arsarluartorujussuanngorpoq. Periarfissarujussuit marluk maangaannartinneqarput. 22 - 19. Pingasuinnarnik inulerpaat. Suli periarfissaqarpoq.

Siuarsimajunarput

Unamminerup naammassinissaanut minutsit qulit sinneruttut Team Tvis Holstebro isertitsinernik tallimanik siuaqqippoq. Unammineq ingerlalluaqqilerpoq. GOG-li isertitsinernik sisamanik qaninnerulinngisaannarpoq. Angerlarsimaffimminnilu unammisut illersuisuinut nuannaarutaasumik unammineq 30 - 25-mik inerneqarpoq. Team Tvis Holstebro siullerpaamik DM finalimut annguppoq.

Finalimi unammisassaa sapaammi unamminermi nassaarineqassaaq, tassani semifinalip aappaani unammissallutik KIF Kolding København aamma Bjerringbro-Silkeborg.

Isertitai 19-it

Minik Dahl Høegh unammailluartorujussooqqippoq qulingiluanik isertitaqarluni. Team Tvis Holstebromut unamminermi siullermi qulinik isertitaqarpoq. Tassa semifinalini marlunni katillugit 19-inik isertitsilluni. Unamminerup kingorna GOG-mi unammisartut pakatsisorujussuupput. Finalimut anngunnissamik sinnattu qatangiinnarpoq. Maanna annerpaamik bronzenassinnaanngorput.

Minik Dahl Høegh Sermitsiaq.AG-mut oqarpoq:

– Unamminerup immikkoortuani siullermi unamminerput pakatsinaqaaq. Naluara minutsit siulliit 30-t taamatut ingerlanersut. Qujanartumik immikkoortup aappaani ingerlalluarneruvugut piffissallu ilaani angungajakkaluarpavut pingasuinnarnik inulerlugit.

Maanna siumut isigissaagut

Aamma sungiusaasup Jakob Larsenip unamminerup immikkoortuani siullermi ingerlanerliornertik ajuusaarutigaa.

– Muminnermi isertitsinernik arfineq-marlunnik kinguarsimavugut, taamaattumik ajornakusoortussaavoq. Isumaqarpungali immikkoortup aappaani ajunngitsumik ingerlasugut. Maanna unamminerni kingullerni marlunni sæsoni naalluarniassavarput. Bronzenanniunnissami KIF Kolding København imaluunniit Bjerringbro-Silkeborg unammissaneripput apeqqutaavallaanngilaq.

Assit ataani takukkit

 

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER