assammik arsarneq
Assit takukkit: GM-imi NÛK N-48-lu naligeeqisut
Pissartanngorniunnerup ulluani siullermi holdit pitsaanerpaamik takutitsipput
Angutit inersimasut Ilulissani nunatsinni pissartanngorniunneranni, arfininngormat aallartittumi, NÛK N-48-lu unammigamik sapinngisartik tamaat tamaviaarput.
Unammineq 28-28-mik inerneqarpoq. Unamminerup naammassinissaanut minutsit tallimaannanngortut N-48 målinik tallimanik siuarsimavoq, tamaatumali kingorna Iluliarmiut periarfissat maangaannartittarpaat, tamannalu akeraasa atorluarpaat.
Timersortarfimmi isiginnaartunik ulikkaavissumi sekundit kingulliit angullugit holdit tamaviaartorujussuupput. Sakkortuumik arsartoqarnera pissutigalugu ilaatigut N-48-mi unammisartutoqaq Peter Frederik Olsen (Taki) aappalaartumik nittaavigineqarluni unamminermit peersitaavoq.
Norsaq ajugaavoq
Angutit pissartanngorniunnerani ullormi siullermi Norsaq HC Aasianneersoq SAK-lu Sisimiuneersoq aamma unammipput.
Pissartanngorniunnermi Norsaq aallartilluarpoq. SAK malinnaalluaraluartoq ersarilluinnarpoq Norsaq pissartanngorniunnermut takkussimasoq piumassuseqarluarluni, unamminermilu 29 - 25-mik ajugaavoq.
NÛK ajugaarujussuarpoq
Arnat unammiuaarneranni unamminermi siullermi NÛK-p takutippaa akeqqaminit Norsaq-mit sukalaneroqaluni. Taamaasilluni holdi Nuummeersoq holdimut Aasianneersumut 42 - 15-imik ajugaavoq.
Taamatuttaarlu N-48 aamma Nagtoralik-45 unammimmata sukalassusaat assigiinngitsorujussuuvoq, arnat Paamiuneersut sukalanertik takutillugu holdi Ilulissaneersoq 30 - 17-imik ajugaaffigaat.
Kinguaattoornerit
Pissartanngorniunneq holdit tamarmik piffissaq eqqorlugu tikissimannginnerannik sunnerneqarpoq. Kinguaattoornernik ilaatigut eqqorneqarpoq N-85, Narsameersoq.
Assit ataani takukkit