Nuuk
Assit takukkit: Filmip ´Unnuap Taanerpaaffiani´ takuteqqaarneqarnera
Kalaallit filmiliaat qiiaammernartoq ´Unnuap Taarnerpaaffiani´ tallimanngormat Nuummi takuteqqaarneqarmat isiginnaartunit nikuilluni ersaartaanneqarpoq
Qiiaammisaarneq kalaallit ukiorsiornerannut ilaavoq. Kalaallit oqaluttuaat qiiaammernartut pitsaanerpaat ilagaat Ikusimmiooq, taannalu filmimi ´Unnuap Taarnerpaaffiani´, tallimanngormat unnukkut Nuummi kulturip illorsuani Katuami takuteqqaarneqartumi, isumassarsiorfigineqarsimavoq. Ilitsersuisoq manuskiptimillu allattoq Malik Kleist filmi suliarigamikku nammineq qiiaammertarsimavoq.
– Unnuaanerusukkut sulisarsimavugut. Arlaleriarlunga uanga nammineq qiiaammertarsimavunga, Malik Kleist Sermitsiaq.AG-mut oqaluttuarpoq.
Filmi
Inuusuttut Minik Hansilu inuunerminni pissanganartunik amigaateqarput. Pissanganartorsiorumalluni Hansi siunnersuivoq illumik kalupittartumik ujarlissallutik tassanilu unnuillutik. Imaasiallaannaq illumik kalupittartumik nassaarput, eqqumiitsunillu pisoqartalerpoq.
Filmimi illu ikinngutigiit isersimaffianni aliortugaavoq angakkutoqaq tupilaalu ´Ikusimmiooq´.
Filmi akunnerup aappaata affaanik sivisussuseqarpoq. Minutsit taakkua ingerlaneranni Katuap inersuani ersiorluni nilliallattoqartarpoq.
– Kalaallit qiiaammernartumik filmiliaasa aappassaraat. Filmi akikitsumik sananeqarpoq. Aliikkuaralugu isiginnaartitsisartut amerlanerpaat piumassutsiminnik peqataapput. Filmi katillugit 750.000 koruuninik akeqarsimavoq, ukiullu aappaata affaani sanavarput, Malik Kleist oqaluttuarpoq.
– Naggatissaa tikillugu tamaviaarnarsimaqaaq, ilitsersuisoq oqarpoq.
Ikusimmiuumik oqaluttuaq siullermik tusarsimavaa Qaqortumi meeraalluni, kingornalu aamma oqaluttuaq Nuummi tusarsimallugu.
Kalaallit Nunaanni filmiliorneq ullumikkut aningaasaliisoqarani ingerlanneqarsinnaanngilaq, taanna qujalluni oqalugiarnermini oqarpoq.
– Neriuppunga inimi aalajangiisartoqartoq siunssami Kalaallit Nunaanni filmiliornermik tapersersuerusuttumik, ilitsersuisoq imminut ilinniartissimasoq, KNR-milu assiliissummik ingerlatsisuusimasoq, oqarpoq.