pissartanngorniunneq
Assit takukkit: Assammik arsaalluni pissartanngorniunneq aallarteruttorpoq
Siorna angutini arnanilu pissartaasimasut aamma ilimagineqareersut GSS aallartilluarput, unamminerillu siulliit ajugaaffigilluavippaat.
Assammik arsaalluni Nuummi Inussivimmi pissartanngorniunneqarnerani arfinileriarluni unammisoqarpoq.
Marlunngornermi unammisut siulliit tassaapput arnat GSS aamma Nagdlunguak. Tassani sungaartunik tujuuluarallit GSS 50-11-mik ajugaapput, taakku ukiuni arfineq-marlunni kingullerni pissartaapput. Arnannguaq Steenholdt GSS-imeersoq unammilluarnerpaatut toqqarneqarpoq.
Inuusuttut iligiit, Team Nuuk, Aasianneersut Norsaq HC 31-26-mik ajugaaffigaat, tassani Nivi Jensen Petersen ajugaasuni arsartoq unamminermi arsarluarnerpaatut toqqarneqarpoq.
Arnat unammineranni ullormi unammisuni kingulliupput, aaqqissuisut NÛK aamma SAK. SAK sekundimi kingullermi isertitsinissamut periarfissaqaraluarpoq, kisianni strafferluni isertitseriarneq atorluarneqanngilaq. Taamaalilluni NÛK 32-31-mik ajugaavoq. Christina V. Lange arsarluarnerpaatut toqqarneqarpoq.
Angutit unammineri
Nagtoralik Paamiuneersut aamma Nagdlunguak Ilulissaneersut angutini unammeqqaarput.
Tassani Ilulissaneersut 34-23-mik ajugaallualaavipput. Nuunu Lars Olsen Nagdlúnguameersoq arsarluarnerpaatut toqqarneqarpoq.
Unammisut aappaanni GSS-ikkut Norsaq HC-mut målinik qulinik ajugaavoq. 30-20 unamminerup inerneraa, tassani Nuka B. Heilmann GSS-imeersoq arsarluarnerpaatut toqqarneqarpoq.
Unamminermi kingullermi NÛK aamma SAK unammipput. Unammineq naligiiffioreersoq timersoqatigiiffik aaqqissuisoq 25-23-mik ajugaavoq. Gustav Ostermann Egede, NÛK, unamminermi arsarluarnerpaalluni.
Pissartanngorniunnerit ullumi pingasunngornermi ingerlaqqissapput.
Aajuku ullumi unammisussat:
Arnat:
- Nal. 13.00: SAK - GSS
- Nal. 16.00: Team Nuuk - Nagdlunguak
- Nal. 19.00: NÛK - Norsaq HC
Angutit:
- Nal. 14.30: Nagtoralik - SAK
- Nal. 17.30: NÛK - Norsaq HC
- Nal. 20.30: Nagdlunguak - GSS