ikinngutigiinneq
Assit: Skak ikinngutigiinnermut aqqutigaat
Islandimiut skakkimut peqatigiiffiat Hrokurinn Upernavimmi tikeraarpoq
Sapaatip akunnerata naanerani Upernavimmi skakkertoqarpoq. Islandimiut skakkimut peqatigiiffiat Hrokurin skakkertalerusuttunut skakkerfinnik ilisimasaminnillu neqerooruteqarput. Hrokurinn Illoqqortoormiuni Qaqortumilu arlaleriarluni aaqqissuussisareersoq maanna aamma Upernavimmiissimalerpoq.
- Upernavimmi isertugaalluarnerpaamik toqqortaateqarunarput tassaniippummi inuit ilakkuminarluinnartut, Hrokurinnimi siulittaasoq Hralt Jokulsson oqarpoq.
Katersortarfimmi skakkertitsisoqarpoq aammalu najugaqarfiit ilaat inuusuttuaqqallu ornittagaat pulaarneqarlutik. Aammattaaq Upernaviup Islandimi ikinngutaanit tunissutit apuunneqarput
Islandimiut tikeraarnerat iluatsillugu Upernavimmi skakkertartut peqatigiiffiat pilersinneqarpoq Steffen Lynge siornatigut Qaqortumi skakkertoqarnerani peqataareersimasoq peqatigiiffimmi nutaami Nanoq-mi siulittaasunngormat.
Hrokurin januarimi nunatsinnukaqqinniarpoq Illoqqortoormiuni, Kulusummi Kuummiunilu skakkertitsissalluni.