pilluaritsi
Assit: Sisimiuni timersullammak toqqarpaat
Nersornaatit assigiinngitsut sisamat agguaanneqarput Sisimiuni timersortartut ulluat nalliussineqarmat
Sisimiuni timersullammammik toqqaaneq pivoq kunngit pingasut ulluanni januarip arfernat qajartortartoq Emaanooraq Nathansen Qajaq Sisimiuneersoq timersullammattut toqqagaalluni.
Sisimiut timersortarfianni peqataaffigineqarluartumik timersullammammik toqqaasoqarpoq. Timersullammamik toqqaasarneq Sisimiuni 2009-mi ukiut tamakkiallugit pisalerpoq. Peqataasut kaffillerfigineqarlutillu tiimik kaaginillu sassaallerfigineqarput.
Nersornaasigaasut diplomip saniatigut tupilammik tammaviuttussinneqarput Qeqqata Kommuniani borgmesterimit Hermann Berthelsenimit Siumumeersumit tunniunneqartunik
Sisimiormiut timersortartut 2013-mi angusarissaarsimapput kultit 159-it pissarsiaralugit sølvit 139-it bronzellu 171-it.
Nersornaatisitinneqartut tassaapput:
Timersullammak: Emaanooraq Nathansen, Qajaq Sisimiut
Ukiorpanngortuni timersoqatigiiffimmini ilaasortatut unammisartuuvoq ukiullu ingerlanerini imminut timersornikkut ineriartortittuarsimalluni. Timersortartutut ingerlatsinermini ukiuni arlaqalersuni nuna tamakkerlugu unammersuarneranni pitsaanerpaat pingasut akornaniittuarsimavoq, timersoqatigisartakkaminullu ikiuukkumatuujuvoq siunnersuisarluni kiisalu timersoqatigiiffimmut tunniusimasuulluni.
Piginnaasalik: Inukkuluk G. Lennert, Sisimiut Taekwon-Do Klub
Mikisuullunili timersuutini aallutarilersimavaa, qulingiluanillu ukioqarluni (2012) ukiukinnerpaatut qernertumik qitequtitaarpoq. Ukiuni kingullerni pingasuni unammersuaartarnerni ukioqatiminit suli ajorsartinneqanngilaq ukiorlu 2013-imi unammiffigisani tamakkerlugit guld-innaffigai. Ukioqatiminit nunanut allanut unammisartussatut toqqagaanikuuvoq.
Sungiusaallammak: Frederik A. Nielsen, Sisimiut Taekwon-Do Klub
Sungiusaasup angusaqarluassagaanni siunertalimmik sungiusarnissaq pingaartitaraa, aammalu pissuserissuunissaq ileqqorissuunissaq sungiusakkaminut oqariartuutigiuartarlugu.
Ukioq 2013-imi nuna tamakkerlugu unammersuarneq ingerlanneqarmat pokali ingerlaartoq Sisimiunut angerlaanneqarpoq. Tamatuma angusinnaaneranut pissutaavoq aalajaalluni piumassuseqarluarlunilu ukiup ingerlanerani piffissaq annertooq atorlugu sungiusaajuarnini. Meeqqat, inuusuttaqqat inersimasullu angutini arnanilu sungiusagarivai.
Ataqqinaat: Hanninnguaq Berthelsen, SSP arpattartut
Qanga inuusukkallarami sangusaarneq, tinngallattaarneq sisoraatinillu arpannermik ingerlataqarnikuuvoq. Inuusukkunnaarnermini timersoqatigiiffimmi siulersuisuni piffissami sivisuumi ingerlataqarsimavoq, ullumikkullu Arctic Circle Race-imi, ujakkaarluni sangusaarnermilu unammersuaartoqarnermi ikiuuttuaannartuulluni. Sinerissami tusaamasaassutigaa Sisimiuni unammersuaartoqartillugu måldommeritut tikeraartitsisarnera.