Sisamanngormat unnukkut arsarnerit aalaartut tunuliaqutaralugit Katusami Hans Lyngep Inersuaaraani ulikkaavissumi Rasmus Lyberth qiimasorujussuulluni tusarnaartitsivoq. Nipilersortui pikkorissut taswsapput Jane Clark, agiartoq, Christian Søgård supputaasartoq aamma Kristoffer Jul Reenberg, Hammondorgel-ertroq keyboard-ertorlu.
Nunarsuarmi tusarteqqaagaq
Erinarsuutit ilaatigut ilisimaneqarluartuupput, tusarnaartut arlaleriarlutik erinarsoqataaffigisartagaat erinarsuusiallu nutaajunerusut, tamakkua ilaat ippassaammat aatsaat naammassineqarsimasoq. Taamaattumik Rasmus Lyberth, nammineq oqarneratut, nunarsuarmi saqqummiusseqqaarpoq.
Sungiussisimarpasilluni
Qularutissaanngilaq Rasmus Lyberthip scene-miinnini nuannareqigaa allamullu saatitassaanngitsoq. Tusarnaartut tusarnaartitsineq naallugu tiguartissimaqaat, naammaginartumik sivisussuseqaraluarluni sivikippallaamik misigisimanartoq. Tusarnaartitsineq naallugu eqqissisimarpasinnermigut ingerlatsilluarnermigullu Rasmus Lyberth anguteerannguuvoq nalissaqanngitsumik erinalik angullu pequertoq nikeriaqattaarluni nipinik tupinnartunik anisitsisartoq, nipilersukkamut naleruulluinnartunik.
Nunarsuarmut ingerlaqqissaaq              
Katuami paasissutissiinermut suliniutinullu ataqatigiissaarisoq Anton Overballe tusarnaartitsineq aallarnerlugu oqalugiarami oqarpoq Katuap tulluusimaarutigisorujussuugaa Rasmus Lyberth kulturip illorsuani tusarnaartitsiumasimammat Canadamut tusarnaartitsiartunnginnermini. Katuami tusarnaartitsineq piviusunngorsinnaasimavoq Katuap pingaarnertut aningaasaliisuat Air Greenlandip, suleqatiginnilluartorujussuusimasup, ikiuunneratigut.