ilinniagaqarneq
Assit: Nunarsuarmiooqataanermut piareerluarpusi
Tallimanngormat TNI-mi lærlingit Campus Kujallermi ilinniakkaminnik naammassinnipput
– Ilinniakkasi tassaasimapput naatsorsuuserineq, kulturinik paasinninneq nunarsuarmioqatigiillu niueqatigiinnerat. Taamaammat ilissi piareersimalluarpusi massakkut Kalaallit Nunaata nunarsuarmioqataaneruleriartorneranut peqataanissassinnut, forstander Steffen Lund TNI-mi lærlingit 38-it soraarummeermata oqarpoq.
Ilinniartut kingulliit tallimanngormat ualikkut fagprøverput, Campus Kujallermi soraarummeersitsinissaq sioqqutilaarlugu, tassani atuagarsorsimanermut uppernarsaatit ilinniartunut tunniunneqarlutik. Maanna praktikkernissaq kisiat amigaatigaat, tamatumalu kingorna TNI-mi ilinniagartik ukiunik sisamanik sivisussusilik naammassissavaat.
Steffen Lund oqalugiarnermini ilaatigut oqarpoq lærlingit 38-it akunnerni 2.400-ni atuartinneqarsimasut.
– ilarpassuasi atuariartorlutik angalasimapput taamaammat annertuumik akiliuteqartarsimavusi, tassa atuariartarnissinni ilaquttanut kammalaatinullu maqaasinerit. Ukiut sisamat ingerlaneranni sap.akunnerit 76-it peqanngissimavusi. Pikkoreqaasi, taanna oqarpoq.
Soraarummeerlutik naammassisut nalliuttorsiutigineqarnerani oqalugiartoqarpoq, erinarsoqatigiittoqarpoq, qilaatersortoqarpoq aammalu flidspræmia-mik tunniussisoqarluni.
Kommune Kujalleq sinnerlugu 1.viceborgmester Simon Simonsen pilluaqqusilluni oqalugiarpoq.