tusarnaartitseqatigiinneq
Assit: Nive Angulu qaqutigoortumik tusarnaaqatigiittut
Angu Motzfeldt Nive Nielsenilu tusarnaartitseqatigeeqqammerput
Kulturstationenimi Vanløsemiittumi kalaallinik marlunnik ataatsimut tusarnaartitseqatigiittoqarpoq, Nive Nielsen Angu Motzfeldtilu, tusarnaartitsinerlu tallimanngormat ingerlanneqarluni. Nive Nielsen USA-miit tikeqqammerpoq, tassani tusarnaartitsillunilu nuusiassaminut nutaamut aamma immiussilluni.
Tusarnaartitsinerup ingerlanerani marluullutik tusarnaartitsipput 'Good for you - or anyone else' atorlugu.
Inuit akornanni tusarnaartitsinermut sungiussilluarsimasoq Nive Nielsen atugassani qanoq pinngorsimanersut oqaluttuareqqaartarpai.
Tusarnaartitsineq nuannersuuvoq, tusarnaarnerani angerlarsimasutut misigisimalernarluni, malunnarluni USA-mi tusarnaartitsisimanernut allaanerusumik tusarnaartitsisut. USA-mi angalanermi Austinimi Texasimi nipilersornermik festivaleqarnermi South By Southwestimi Nive Nielsen nipilersoqatigisartakkanilu tusarnaartitsipput, ilaatigut ullormut arlaleriarlutik tusarnaartitsisarlutik.
Texasimeereernermi kingorna Nashville Tennesseemi North Carolinami Kentuckymilu nuusiassaminnut nutaamut immiussipput.
Nive Nielsenip manageria Jan de Vroede Sermitsiaq.AG-imit aperineqarpoq, tusarnaartitsiffiit assigiinngitsut, assigiinngitsunik nipeqalertitsisarnersut.
- Aap taamaappoq. Sumiiffiit nipilersorfigisavut tamaasa assigiinngitsunik pineqartarput, nipilersorfigisami aalajangersimasumi ilaatigut nutaanik eqqarsartoqartariaqartarluni, Jan de Vroede oqaluttuarpoq.
Nipilersortartut assigiinngitsut akornaniilluni nutaanik isumassarsinarpa?
Aappi assut. Qanoq assigiinngitsunik nipilersueriaaseqartoqarsinnaaneranik paasisaqarnartorujussuusarpoq. Taamaammat nipilersornerit ilaat siumut takoreerneqarsinnaaneq ajorput.
Nive nipilersoqatigisartakkani peqatigalugit USA-liaqqissaaq tassani taalliortartut allat peqatigalugit ataatsimoortunut peqataassagamik, tassanngaanniillu assigiinngitsunut tusarnaartitsiartussallutik. Ilaatigut ukunani tusarnaartitsissapput: Georgia, Texas, Arizona, British Columbia aammalu Canadami Yukonimi.
Nive Nielsen & The Deer Childrensikkut nuusiaat nutaaq ukiup ingerlanerani saqqummissaaq.