Assit: Neriusaani juullerpalaarneq

Fynio kujataani najugallit amerlasuut Kalaallit Nunaannut arlaatigut atassutillit ataasinngornerup ualinissaa erinigasarpaat.

Sutorniartarfimmi Neriusaat Svendbogimi kajumissutsiminnik suliaqartut illuutaata kælderianiittoq ammasarpoq.

Kikkut tamarmik tikilluaqqusaapput

Kalaallit Nunaannut soqutiginnittut Nariusaamut tamarmik tikilluaqqusaapput. Kaffit kaagillu sassaalliutigineqartarput quppersakkallu atuarneqarsinnaasut piareeqqasarlutik. Pulaartullu naapisimaarnissaannut cafemi sulisut ningiuallumi aamma piareeqqasarlutik.
Cafep ningiua Irene Holm ukiut arfine-marluk Tiniteqilaami atuarfiup ningiuusimanerminit Nunatsinni inuunermik misilittagaqarpoq. Kajumissutsimillu suliaqartut aamma apeqqutissaqartoqaraangat eqqartuerusuttoqaraangalluunniit piareersimajuaannarlutik.

Kajumissutsimik suliaqartut illuat

Kajumissutsimik suliaqartut illuat qanga meeqqanut napparsimaviusimasoq kajumissutsimik suliat 70-t assigiinngitsut illumi ingerlanneqartarput. Hjerteforening, qaratsamikkut innarlersimasut peqatigiiffiat, sukkortut peqatigiiffiat, gigtertut peqatigiiffiat, AA (Imigassamik atornerluisut), aliasuutillullu naapittarfiattut ilaatigut atorneqarluni.

Danmarkimut qimaasut nunasinikut kajumissutsimik suliaqartut danskisut ilinniartittarpaat. Tuluttut aamma ilinniartoqarsinnaavoq. Tassa kajumissutsimik suliaqartut illuat ullut tamaasa uummaarilluinnartumik atorneqartarpoq.

Illuuvoq kikkunnut tamanut inissaqartitsisoq sullissiumasunillu ulikkaartoq. Isumassarsiaqaraanni sulissutingerusutamik pilersaarusioriarluni saqqummiukkuni imaassinnaasoq suliniummik nutaamik aamma aallartitsisoqartoq.

Ataasinngornikkullu Neriusaami kalaallisuinnaq oqaluttoqartarpoq.

Kalaallisut illaqatigiilluni nuanneqaaq

Ukiut apeqqutaanatik Neriusaamiittoqarsinnaavoq. Sermitsiaq.AG-lu pulaarmat pisarnermit inukinneruvoq. Pulaartartutoqqammi arlallit napparsimammata. Aka Johansen panini pingasut ilagalugit Langelandimit peqataajartorpoq. Langelandimeersullu arlaqarput peqataasut.
Kajumissutsiminnik suleqataasut Rigmor Olsen Anne Rosengreenilu aamma Langelandimeersuupput.

- Neriusaani ukiut tallimat kajumissutsinnik suleqataavunga. Nuanneqimmat maaniittarneq, kalaallisut oqalulluni, nuannisarluni kalaallilluni nuannarisaannik illaqatigiilluni. Nuanneqaaq!, Rigmor Olsen oqaluttuarpoq.

Regine Christensenimut, 1965-mi Kalaallit Nunaannit Danmarkimut nuunnikoq, cafeemi tiimialunni naapisimaartarneq kalaaleqatillumi naapisimaarlugit nuannisaqatigiittarneq isumalerujussuuvoq.

Sammisassat assigiinngitsut

Sammisassat saniatigut aamma arlaannut angalaqatigiittoqartarpoq. Cafeemiittartut Esbjergimeeqatigiinnikuupput Kalaallit Illuat alakkarlugu. Nordatlantisk Husimut Odensemiittumut Inuiattut ullorsiornitsinni katerisimaartoqarpoq. Ukiumullu arlaleriarluni nereqatigiittoqarnerani suaasat mamarineqarluartarlutik.

Neriusaat Kalaallit Illuata Odensemiittut sullitaasa ilagaat.