skakkerneq
Assit: Kulusumi skakkernermik ilitsersuineq
Meeqqat atuarfianni atuartunut skakkernermik ilitsersuisoqarlunilu unammisitsisoqarpoq sapaatip akunnerata siuliani
Kulusumi skakkernermik ilitsersuineq naammassineqarpoq sisamanngormat, tassani qilaatersortartoq Anda Kuitse uaajeerpoq.
Skakkernermik ilitsersuineq marlunngormat aallartinneqarpoq meeqqanut 45-nut. Pingasunngormat aamma unammisitsisoqarpoq.
Pissanganartumik unammereernermi 14-nik ukiulik Mikilina Maratse Kulusumi ajugaavoq, Enos Utuaq sølvinnappoq kiisalu Jootut Maratse aamma David Siniale bronzennallutik.
Skakkerutinik 100-nik aamma tunniussisoqarpoq. Skakkertartut islandimi peqatigiiffiata Hrókurinnip Kulusummut tikeraartarnerat meeqqat atuarfiata pisortaanit Justine Boassenimit nersualaarneqarpoq. Arlaleriarlutimmi 2014-mili tikeraareeput.
Titartakkat
Kulusumi aamma kisimi skakkertoqanngilaq, meeqqammi islandimeersut aamma titartagarisimasaat saqqummersinneqarput.
Skakkertartut islandimeersut Nuummut aappaagu aamma tikeraassapput, tassani ilaatigut Polar Pelagic Skakfesten 2016 ingerlanneqassaaq.
Assit ataani takukkit