pilluaritsi
Assit: Jens-Frederik Nielsen Nuummi timersullammattut toqqarneqartoq
Kommuneqarfik Sermersooq timersortartunik assigiinngitsunik Nuummeersunik marlunngormat nersuivoq
Jens-Frederik Nielsen Nuummi timersullammattut toqqarneqarpoq. 'Timersortartut Ulluat' Kommuneqarfik Sermersuumit aaqqissuunneqartoq pisarnertut Nuummi Illorsuaq Timersortarfimmi marlunngornermi januaarip arferngani ingerlanneqarmat.
Jens-Frederik Nielsen sulorarnermi GM-ertoqarnerani pingasoriarluni kuultinnappoq, kiisalu isikkamik arsaattartut B-67 peqatigalugit aamma kuultinnalluni ukioq kingulleq.
Nersornaaserneqartut
Qutsillammattut toqqarneqarpoq ujakkaartartut peqatigiiffiannit NSP-meersoq Flemming Enequist. Ukiorpassuarni timersornerup silarsuaani suliaqarsimanera tunngavilersuutigineqarluni toqqarneqarpoq.
Sungiusaasuullammattut toqqarneqarpoq Nuummi eqaarsaartartut peqatigiiffianneersoq Sara Thiesen. Sara Thiesen ukiut qulit sinnerlugit Nuuk Gymnastikforeningimi annertoorujussuarmik suliaqarpoq, peqatigiiffimmi ilaasortat meeqqat anginerit inuusuttuaqqallu pissittartutik eqaarsaartartut sungiusagaralugit.
Iligiillammattut toqqarneqarput Taekwon-Do Klubbi 'Juche'. Timersoqatigiiffimmi ilaasortat, nunat tamalaat akornanni aamma nunatsinni unammersuarnerni peqataasimapput aamma arlalinnik ujaminnattaaqarlutik.
Piukkunnaatilittut toqqarneqarpoq talermittartoq Minik Sune Trondheim Johansen. Miniup timersuutini ineriartortikkumallugu sapaatip akunneranut arfinileriarluni sungiusartarpoq aamma nammineq milisittakkani ingerlateqqikkumallugit inuusuttuaqqat sungiusartarlugit.
Kajumissaaserneqarpoq Ivalu Kleist. Inuusuttuaranngulerluni assammik arsarnermik soqutigisaqalerpoq, NÛK-mi arnani inuusuttuaqqani arsaqataasalerluni. Ivalu aamma meeqqanut sungiusaasarpoq. Siornatigut VM-imi peqataasareernikuuvoq.
Assit ataani takukkit