Assit: Immikkut ittumik nioqqutissanik Sarfanngualiaassineq

Kalaallit Nunaanni sila sapaatit akunnerini kingullerni issittorujussuuvoq.

Suli issingaatsiassagunarmat suli immakkut angallisinnaaneq ajornarallarniarpasippoq.

Isseqimmat Sarfannguit eqqaani siku ima issutigilersimavoq allaat Royal Arctic-ip nunaqarfinnukartittagaa pajunnissaraluani marloriarluni taamaatiinnartariaqartarsimallugu.

KNI tusagassiuutinut nalunaaruteqarpoq.

Snescooterit periarfissatuaagallartut
Umiarsuakkut tikinneqarsinnaasimannginnermi maanna pisiniarfimmi nioqqutissanik amigaateqartoqartalersimavoq, taamaattumik KNI Pilersuisoq maanna nioqqutissanik pisariaqartinneqartunik pilersuinissami qamuteralannik nunaqarfiliaassisoqarnissamik suliniuteqarpoq, nioqqutissallu Sisimiuniit Sarfannguanut qamuteralannik apuunneqassapput.

- Nioqqutissanik qamuteralannik assartorlugit apuussisinnaanerput nuannaarutigaarput, taamaalillutami pisisartut nioqqutissat amigaatigisatik pisiarisinnaajumaaraat qulakkeerparput. Maanna qamuteralannik assartuinissaq kisimi periarfissaagallarpoq, nunaqarfimmummi qulimiguulimmik apuuttoqarneq ajorpoq, Sarfannguimmi kangerlummi ilorpasissumiilluni sikua issuallaarami angallavigineqarsinnaanngilaq, Pilersuisup pisortaa Finn Fabricius tusagassiuutinut nalunaarummi oqarpoq.

Sapaatip akunnerata siuliani qamuteralaat kalittakkerlugit Sisimiuniit nunaqarfimmut pajutsinneqarput. Tallinngorneq 13. februar qamuteralaat sisamat nunaqarfiup pisiniarfianut nioqqutissanik pajutsinneqarput.
Sapaatip akunnerani matumani qamuteralaat nioqqutissanik Sarfanngualiaassinissaat pilersaarusiorneqareerpoq.

Assit ataani takukkit