tikeraartoq
Assit: Ban Ki-moon inussiarnissusermik siumuisinneqarpoq
FNp allattuunerata Ban Ki-moonip Uummannamut tikeraarnera Uummannarmi meeqqat angerlarsimaffianni sulisut najugaqartullu puigunaatsorsiffigaat
FNip allattuunera Ban Ki-moon malittaalu pingasunngornermi Uummannamut tikinnermi nipilersoqatigiinnit agiartulinnit inussiarnissusermillu siumuisinneqarput. Silaannalli allanngoriartornera isumakuluutissiivoq.
Meeqqat angerlarsimaffianni nipilersoqatigiit agiartullit ’Qaqqat akornanni qooqqutigut’ atorpaat Ban Ki-moon, statsminister Helle Thorning Schmidt aamma Naalakkersuisut siulittaasuat Aleqa Hammond Siumumeersoq meeqqat angerlarsimaffiannut isermata.
Sikumi saatsersumi
- Tikeraartunut nipilersornissaminnut meeqqat sivisuumik piareersarsimapput. Ban Ki-moon aamma qanilaartuuvut oqaatigineqartunut naalaarusussuseqartuulluni, Uummannami meeqqat angerlarsimaffianni ningiuusoq Ann Andreasen Sermitsiaq.AG-mut oqarpoq.
Silap pissusaa pillugu nunat tamalaat septemberimi New Yorkimi isumasioqatigiinnissaanni Ban Ki-moon siuuttuusussaavoq Nunatsinnilu tikeraarneq isumasioqatigiinnissarsuarmut piareersaataavoq.
- Assut iluarpoq silaannaap allanngoriartornerata nassatai nammineq isiminik takummagit. Uummannap sulluani siku siornatigutut issutigissaarpoq ilaatigullu sumiiffinni arlalinni aqqutissaanani. Tamanna aalisartut piniartullu sulinerannut sunniuteqarpoq, Ann Andreasen oqarpoq.
Taanna aamma periarfissaqarpoq Ban Ki-moonimik oqaloqateqarnissamut.
- Piujuaannartitsinissamik meeqqallu pisinnaatitaaffiinik assut soqutiginnippoq. Ban Ki-moon Helle Thorning-Schmidtilu Uummannarmiunit inussiarnisaarfigineqarnerminnut assorsuaq tuppallernerarput, Ann Andreasen oqarpoq.
Ban Ki-moon angalataalu sisamanngornermi Ilulissaniipput.
Assit allaaserisap ataani takusinnaavatit