assammik arsarnermi GM
Assit: Assammik arsarnermi GM taamaasilluni pissanganarsivoq
Assammik arsarnermi GM-qarnerani angutit unammineranni NÛKp Nagdlúnguullu unammineranni pissanganissamik ilimasuutit eqquupput
Assammik arsarnermi inersimasut Nuummi GM-qarneranni angutini pulje B-mi Nagdlúnguak Ilulissaneersoq ajugaasuuvoq. Puljemi tassani finalemi NÛK-mut unaminerat pissanganaqisumik naggaserneqarpoq unamminermilu tassani anisitsinerit allagartamillu aappalaartumik takutsineq aqqusaarneqarput. Arnat unammineri marluk aamma pissanganavipput.
Atuaruk: Assammik arsarnermi GM-mi pikkunartumik unammilersut
Angutit pikkorinnerit mellemrundeqarnissaat pissanganassagunarpoq. Nagdlúnguak aamma NÛK mellemrundemut ingerlaqqipput tassanilu Nagdlúnguak pointinik marlunnik pingaaruteqaqisunik nassataqarpoq. GSS pulje A-mi ajugaasuuvoq taamalu aamma pointinik marlunnik mellemrundemut nassartussanngorlutik. Sisamanngornermi SAKp K.-33llu unamminerisa takutikkumaarpaat kikkut GSS mellemrundemut annguteqatigissaneraat.
Sungiusaasoq pakatsivoq
Pingasunngornermi Nagdlúnguup NÛK-llu unamminerat pissanganavimmik naggaserneqarpoq. Nagdlúnguak 21-20-mik ajugaavoq muminnermi 11-8-mik siuaqqareerluni. Unamminerup naammassilivinnerani NÛK naligiilernissamut periarfissarsigaluarpoq. Unamminerup naammassinissaanut sekundit 30-iinnanngortut team time-outerput tassanilu isumaqatigeeqqissaarlutik, kisianni:
- Sekundini aalajangiisorujussuarni utaqqisinnaassuseqanngilagut. Periarfissakitsumi isertitseriarneq pinnagu periarfissap suli anginerusup utaqqinissaanut piffissaqaraluarpugut. Taamaammat angusarput naammaginngeqaara, NÛKp sungiusaasua Piitaaraq Rosbach Sermitsiaq.AG-mut oqarpoq.
Taassuma qularutiginngilaa unamminerup inernera allaanerusimasinnaagaluartoq periarfissat NÛK-meersut atorluarnerusimasuuppatigit.
- Titarneq tummarneqaqqusaanngitsoq arlaleriaqaluni tummarneqarpoq aammalu målmand eqquinnarlugu isertitseriartoqartarluni tamannalu assut akisunaarparput, Piitaaq Rosbach pakatsisimaqisoq oqarpoq.
Unamminerup naammassinera Nagdlúnguarmiut naammagisimaarpaat naak unamminerup naajartornerata taama pissangartiginissaa pinngitsoorusussimagaluarlugu.
- Isumaga malillugu ataqatigiinnerput qasujaannerpullu unamminermut aalangiisuupput. Uani unamminermi takuarput naammattumik qasujaallisarsimanngikkaanni arsamik annaasaqarnermik kinguneqarsinnaasoq. Sekundit kingulliit assorsuaq pissangavunga assullu angusarput pillugu nuannaarpugut, Nagdlúnguarmiut paallatsissamaataanni aqutsisoq Kasper Thorleifsen Sermitsiaq.AG-mut oqarpoq.
Pissartat tupatsitaapput
Arnat unammineranni Nuummiut GSS aamma NÛK pissanganavimmik unammipput. Ukiut kingulliit ajugaajuaannartut GSS aamma siorna pissartaasut, unammineq tamaat ilungersortitaapput. Unammineq 19-19-mik naligiiffiuvoq taamaasillutillu NÛK-meersut finalemut anngunnissamut periarfissaginnerulerput.
- Una angusarput ajugaanertut misigaarput immitsinnullu tatiginerulernitsinnik kinguneqarluni, unamminerup kingorna NÛKp sungiusaasua Carsten Olsen oqarpoq.
Unamminerup ilarujussua GSSip sungiusaasua Johannes Groth arsartuminut suaartarpoq tunniussinerit amerlanerit atorlugit isuaniit isertitseriartassasut. Tamannali iluatsippallaanngilaq.
- Unamminerit ingerlaneranni tusaqattaarumaarparsi suaartartunga 800-riarlugu tunniuteqqaartassagaat. Isuaniit isertitseriartitsinissamut taanna sakkussaraarput. Kisianni aamma NÛK-meersut nersualaartariaqarpakka ukiup matuma ingerlanerani pitsanngoriartuinnavissimamamta, Johannes Groth oqarpoq.
Isertitsinerpaat allassimaffiat inissinnerallu linkini talerpiatungaani aasinnaavatit
Aajuku pingasunngornermi angusat:
Kâgssagssuk – Nagdlúnguak (arnat) 23-24 (8-12)
SAK – Norsaq HC (angutit) 31-19 (16-9)
GSS – NÛK (arnat) 19-19 (9-9)
K-33 – GSS (angutit) 20-45 (10-26)
Nagdlúnguak – NÛK (angutit) 21-20 (11-8)
Aajuku sisamanngornermi unamminissat:
Nal. 16.00 K-33 – SAK (angutit)
Nal. 17.30 SAK – GSS (arnat)
Nal. 19.00 QNQ – Norsaq HC (angutit)
Nal. 20.30 Nagdlúnguak – NÛK (arnat)
Assammik arsarnermi GM-mi allaaserisat uani atuakkit