assammik arsarnermi GM
Assit: Assammik arsarnermi GM-mi GSS soriagassaanngilaq
Assammik arsarnermi inersimasut pissartanngorniunneranni GSS ukiut tallimassaa tulleriisillugu pissartanngorpoq. Assit angusallu takukkit
Assammik arsarnermi GM-rtoqarnerani sapaammi naammassisumi GSS Nuummeersoq angutini soriagassaanngiusavippoq. Finalemi GSS Nagdlúnguamut Ilulissaneersumut 39-28-mik ajugaavoq numinnermi 20-12-mik siuaqqareerluni taamalu ukiut tallimassaa tulleriit pissartaalluni.
Atuaruk: GSS marloriaammik pissartanngorpoq
Sapaammi finalemi GSSip pitsaanerunini erngerluni malunnarsisippaa sukkasuumik arsarluni aammalu assersuinermi saassussinermi iligiittut suleqatigiilluarnikkut tamannalu unammersuarnerit ingerlaneranni ilisarnaatigilluarsimavaat.
GSSmi arsartut agguaqatigiissillugu 22-it sinnilaarlugit ukioqarput arsartullu amerlanerit meeraanerminniit GSS-mi assammik arsartartuupput.
- GSS-ip ingerlalluarnera ukiorpassuit ingerlaneranni suliniarluarnikkut tunngavilerneqarnikuuvoq. Kristian Heilmann aamma Rita Egede suliarujussuarmik naammassisaqarnikuupput tamannalu klubbip ingerlalluarneranut tunngaviliisuuvoq, GSS-ip angutitaani sungiusaasoq Ingi Olsen Sermitsiaq.AG-mut oqarpoq.
Isuani arsartartoq Miilu Rosing aamma Andreas Lorentzen iligiinni kisiartaapput meeraanerminni GSS-mi arsartarsimanngitsut. Arsartut amerlanerit Nuummi ilinniagaqarput taamaattumik ukiuni aggersuni suli arsaqatigiittarnissaat ilimanarluarpoq.
Bronzennanniunneq pissanganartoq
- GSS-mi suli meeqqat inuusuttuaqqallu pitsaasumik suliniarfigineqarput taamaasillunilu ukiut arlallit qaangiuppata inersimasuni unammisartuulerumaartussanik imminnut pilersorluarlutik, Ingi Olsen oqarpoq.
NÛK angutini bronzennappoq tassani unamminermi SAK Sisimiuneersoq 23-18-mik ajugaaffigalugu unamminerullu ilarujussua SAK akiuulluarpoq. Muminnermi 9-9-mik naligiipput minutsillu qulit kingulliit aatsaat NÛK aalajangiisumik siuarpoq.
Aajuku sapaammi angusat:
QNQ – Norsaq HC (angutit) normu 5-nngorniunneq 27-31 (11-15)
SAK – Nagdlúnguak (arnat) bronzennanniunneq 47-19 (22-14)
SAK – NÛK (angutit) bronzennanniunneq 23-18 (9-9)
GSS – NÛK (arnat) finale 20-17 (10-11)
GSS – Nagdlúnguak (angutit) finale 39-28 (20-12)
Assammik arsarnermi GM-mi allaaserisat uani atuakkit