piareersarneq
Assit: Arnat arsaannermi nunanut allanut unammisartut ajugaasut
Danmarkimi sungiusaatigalutik unamminerminni takutitsilluarput. Nunammisaasa nersualaarpaat
Tåsinge Stadionimi Tåsinge-mut unamminerminni, isikkamik arsaattartut arnartaat 2-1-mik ajugaapput.
Ajugaanerat annertunerusimasinnaagaluarpoq periarfissatik atorluartartuusimasuuppassuk. Tassami unamminerup naammassiliivinneranni napparutaasaq arsap eqqorpaa.
Unamminerup immikoortuisa siullianni tamarmik isertitaqanngillat. Karo Dahl unamminerup immikkoortuisa aappaanni isertitsivoq. Sivitsunngitsoq Tåsinge isertitsipput. Unamminerlu naammassiliivissoq Oline Kristiansen isertitsivoq, taamaasilluni kalaallit ajugaatillugit 2-1-mik.
Nunanut allanut unammisartut sungiusaasuata Bent Petersenip unammisartut takutitsilluarsimanerat Sermitsiaq.AG-mut oqaatigaa.
- Silami sungiusarpallaarnikuunngikkaluarluta ullumi unammilluaqaagut. Sungiusarsimasagut arlaqartut iluatsipput unamminermi. Kisianni aaqqitassarpassuaqarpugut Island Gameseqataanissatsinnut.
Unammisartut Laila Platoup aamma Laila Brandtip ajoqqusernerat sungiusaasumit ernumagineqarpoq.
Nersualaartipput
Tåsingep sungiusaasuata Martin Haladynip kalaallit unammisartui nersualaarpai.
- Kalaallit Nunaanneersut unammisartut pitsaasorujussuupput. Qasujaapput nukittullutillu suleqatigiillaqqillutillu, Martin Haladyn Sermitsiaq.AG-mut oqarpoq.
Angutit aamma unammipput
Arnat unammereermata angutit aamma unammipput. Aamma Tåsinge unammivaat. Fynseriamit unammisaat nakkaqqammersuupput.
Kalaallit 3-2-mik ajorsarput. Kalaallini Malik Juhl aamma Ari Hermann isertitsisuupput.
Assit ataani takukkit