Suliani tamani isummersuutinik oqaaseqaateqarpoq. Inuit assilisat oqaluttuaanniit isummersuutit. Inuit assilisat pillugit paasisaqarnerorusukkaanni podcastit tusarnaarneqarsinnaapput, assip isiginnaarnerani oqaluttuat tamarmik tusarnaarneqarsinnaallutik.

Shazia Khan saqqummersitami SIULIT-ni, takutikkusuppaa kulturit arlallit tunuliaqutarigaanni ajunngitsortaqarlunilu ilungersunartoqarsinnaasoq. Shazia Khan isumaqarpoq kalaallinit kingoqqisut Danmarkimili najugaqartut pillugit oqaluttuat ajunngilluinnartut tusarneqartarnerat akuttuallaartoq.

Suliarujussuaq

Shazia oqaluttuarpoq saqqummersitsinissap tungaanut ukioq ataaseq suliaqarsimalluni. Soorunami neriuutigaa saqqummersitat sumiiffinni allani aamma saqqummersinneqarumaartut.

- Kalaallinik arlalinnik ikinnguteqarpunga ilisarisimasaqarlungalu. Nuummiinnikuuvunga, kalaallillu akornanni ajunngitsorpassuaqartoq isumaqartuaannarlunga. Kalaallit Nunaat assorsuaq qanilaarfigaara.

Assini inuit assigiinngitsut assilineqarsimasut takuneqarsinnaapput. Shazia Khanip inuit kalaallinit kingoqqisut Danmarkimiittulli assigiinngilluinnarneri ersersippai. Assilitissimasut tamarmik namminneq oqaluttuartinneqarput, ilaallu marluinnit amerlanerusunik kulturiniit kingoqqisuupput.

Nuannersumik oqaasertalerneqartut

Podcastit tusarnaaraanni pilersaarutillu tusarnaaraanni saqqummersitsineq pissarsiaqarnartorujussuuvoq. Assilineqarsimasut kinguliai ilanngunnagit atiinnaatigut assini ilisaritinneqarput. Assilineqarsimasut ilaat ilisarnartuupput, allalli tusaamasaanatik.

Lars Olaf assilitissimasoq oqaluttuarpoq nunat marluk, kulturit marluk, oqaatsillu marluk akornanniikkaanni, kulturit allat aamma soqutiginarluinnalersartut. Malou oqaluttuarpoq nunat marlunneersuugaluaraanniluunniit iluittooreerluni inuusoqartartoq. Laila isumaqarpoq eqqumiitsuliorneq atorlugu silarsuarmut isiginnittariaaseq allanngorluinnarsinnaasoq.

Suliaqarnini nammineq pissarsiaqarfigigaa

Shazia Khan qulanngilaq:

- Assit oqaluttuallu suliarineranni uanga nammineerlunga aamma pissarsiaqarluarpunga. Nammineq misigisakka isumaliutersuutikkalu pillugit oqaloqatissanik amigaateqartarsimavunga. Saqqummersitassat suliarineranni nammineq aqqusaarnikuusakka inissititerluarsimavakka. Suliaqareerninni allaat Pakistaniliarniarlunga aalajangersimavunga.

- Inuit allat oqaluttuaat tusarnaarlugit nammineerlunga angerlarsimanerusutut misigilersimavunga, Shazia Khan oqaloqatigiinnerit pissanganarluinnartut pillugit oqaluttuarpoq.

Shazia Khan Odensemi inuuvoq, suminngaanneernerlunilu aperineqaraangami Odenseminngaanneernerartarluni. Ataataa, Nordatlantisk Husip ungasinngisaani najugaqartoq, saqqummersitsinerup ammaanersiorneqarnerani aamma peqataavoq.

Saqqummersitsinerup ammaanersiorneqarnerani Uummannami Meeqqat angerlarsimaffianni najugaqartut erinarsorput. Qanittuaniissimapput, peqataarusussimallutillu.

Spoken Word Festival

Shazia Khanip saqqummersitai SIULIT Odensemi Spoken Word Festivalimi ilaapput. Spoken Word Festival H. C. Andersen Festivalimut atavoq. SIULIT 23. oktoberip tungaanut takusarneqarsinnaassapput.