Skip to main content

Assigiinngisitsisoqarpoq: Sapaatip akunnerata naanerani misissorteqqittoqarneq ajorpoq

Danmarkimiit Kujataanukassaguit sapaatip akunnerata naalluinnarnerani tikinnissat pitsaanerpaassaaq. Tassa akiuussutissalertissimanngikkuit. Sineriammimi sapaatip akunnerata naanerani misissueqqittoqarneq ajorpoq.

Marlunngornikkut Danmarkimiit Kujataanukarnissamik pilersaaruteqaraanni, misissorteqqinnissap tungaanut, piumasaqaatigineqartutut ulluni tallimani mattusimanissamut sanilliullugu sivikinnerpaamik sapaatip akunnerani ataatsimi mattusimasariaqarpoq. Kujataanimi sineriammilu sumiiffinni allani sapaatip akunnerata naanerani misissuisarfiit matoqqasarput.

Akiuussutissalertereersimasut tallimanngornikkut tikikkunik minnerpaamik ulluni pingasuni misissorteqqinnissamut utaqqisariaqarput, malittarisassat malillugit tikinnerup aqanguani misissorteqqinnerminni tunillatsissimanatik paasineqarpat mattusimasariaqanngikkaluarlutik.

- Peqqissutsimut Naalakkersuisoqarfimmit sumiiffiit assigiinngitsut assigiinngitsunik periarfissaqartillugit neqerooruteqartoqartarnera isumaqanngilaq. Takornariartitsinermit isertitassaraluatut annaasanut sanilliullugit sapaatip akunnerata naanerani immikkut sulisussarsiornissamut aningaasartuutissat annertuallaanngillat, Innovation South Greenlandimi (ISG) takornariartitsarnermi pisortaq Sarah Woodall oqarpoq, nangillunilu:

- Eqqarsaatigilaariarsiuk, Kalaallit Nunaannik misigisaqarusulluinnarlutik takornariarusuttut aporfissaqarluinnaraluarlutik aallarusuttarmata, taamaakkaluartorlu nunatut isumaqatigiissutivut malissinnaanngilagut.

Politikkerit iliuuseqartariaqartut

ISG-mi takornariartitsisarnermi pisortap corona pissutigalugu akiliisinnaajunnaartoqarnissaa ernummatigaa, taannalu isumaqarpoq, misissueqqittoqartannginnerata malitsigisaanik takornariaqanngittoqarneratigut takornariartitsisartut suli amerlanerusut akiliiisinnaajunnaarsinnaasut, takornariammi Kujataani misigisassarsiorsinnaatinnatik immikkut ullumi marlunni-pingasuni mattusimarusunnavianngimmata.

- Neriuutigaara politikkerit tusaallutik maannakkorpiaq iliuuseqassasut. Takornariartummi takornariartitsisartullu aassaanerani sulisinnaanerat killeqareeqaaq, taamaammat piaarnerpaamik ajornartorsiut aaqqiiffigisariaqarparput. Tikeraartartuvut naammagittarsimaqaat, angalanissaminnilli taamaatitsiinnarnissaminnut qanoq sivisutigisumik utaqqisinnaanerat killeqarpoq, Sarah Woodall oqarpoq.

Ataatsimut ataqatigiissaarisoqanngitsoq

Inuit Danmarkimiit Qaqortumut marlunngornikkut tikissagunik tunillatsissimanerlutik tunilatsissimannginnerlutilluunniit paasisaqarnissamik tungaanut sapaatip akunnerani ataatsimi mattusimasariaqarput. Angalanissat misissuinissallu pitsaanerusumik ataqatigiissaarneqartariaqarput, ISG-mit oqaatigineqarpoq.

- Air Greenland Namminersorlutik Oqartussat pigisarivaat, taamaammat ulluni sorlerni misissortittarnissaq misissorteqqittarnissarlu tupaallaatigineqartariaqanngilaq. Peqatigitillugu Namminersorlutik Oqartussat Peqqissutsimut Naalakkersuisoqarfimmut akisussaanerpaapput, taamaammat naalakkersuisoq pisariaqartitsineq naapertorlugu misissuisarnerup aaqqissorneqarnissaanut oqartussaavoq. Taamatut iliuuseqarsinnaanera takornariartitsinermik inuussutissarsiuteqartunut iluaqutaangaatsiartussaavoq, Sarah Woodall oqarpoq.

Air Greenland Københavnip Kangerlussuullu akornanni marlunngornikkut, sisamanngornikkut tallimanngornikkullu angalanerusarpoq.

Nunami maani takorniariartitsisartut isertitarisartakkamik 75 procentii angullugit ukiup aappassaanik annaasaqarsimapput, akiliisinnaajunnaariaannaallutillu, takornariartitsisarnermi pisortaq ilisimatitsivoq.

Sineriammi sulisussaqannginneq

Nuummi Ilulissanilu maannakkorpiaq sapaatip akunnerata naanerani misissuisoqartarpoq, sineriammili illoqarfiit sinnerini misissuisarneq sapaatip akunnerata naanerani matoqqasarluni. Peqqinnissatigut oqartussat allapput, sapaatip akunnerata naanerani misissuisartussanik amigaateqartoqartoq. Sapaatip akunnerata naanerani misissuisoqartalissappat, sulisut misissuisartut sapaatip akunnerata ulluini allani sulinngiffeqartartussaapput.  

- Kujataata Peqqinnissaqarfiani misissortinnissamut neqeroorut nunami illoqarfinnit mikinerusunit allaanerunngilaq, tassa sapaatip akunnerata naanerani misissuisoqartanngilaq.

Taamaallaat illoqarfinni annnersaasuni marlunni, tassalu Nuummi Ilulissanilu sapaatip akunnerata naanerani misissuisoqartarpoq. Misissuinissamut neqerooruteqarnermi tunngavigineqartarpoq, misissuinissamut, akissutinik ilisimatitsisartussanik il. il. sulisussaqarnersoq. Coronamut atatillugu innuttaasunut neqeroorutit nalilersortuarneqartarput, tassunga ilanngullugu sapaatip akunnerata naanerani misissuisoqarnissaanik pisariaqartitsisoqarnersoq. Neqeroorutit allanngortinneqassappata, allannguutit nalinginnaasumik paasissutissiisarfiit aqqutigalugit tamanut saqqummiunneqassapput, peqqinnissatigut oqartussat Sermitsiaq.AG-mut akissauteqarlutik allapput.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER