Kalaallit Nunaat assigiinngisitsinnginnissaq pillugu inatsiseqassaaq, Naalakkersuisut taama isumaqarput, sapaatip-akunnerani matumani siunnersuut Inatsisartunut saqqummiuppaat.

Siunnersuummi annermik assersuutigalugu suiaassutsip, kinguaassiutitigut sammiviup, suiaassutsini kinaassuseqarnerup, suiaassutsimik takutitsinerup, suiaassutsit ilisarnaataasa, kingoqqiffiup aamma innarluuteqarnerup naligiimmik pisinnaatitaaffeqarnerup siuarsarnissaanik siunertaqarpoq.

Inatsit naligiissitsinissamut aalajangiisartunik pilersitsinikkut atuutsinneqassaaq, taakku assigiinngisitsinnginnermut inerteqqummik unioqqutitsisoqarneranik maalaarutinik suliaqartassapput.

Partiit naalakkersuisoqatigiit Siumut aamma IA kiisalu illuatungiliuttunit Demokraatinit ilalerneqarpoq. Naleraq aamma Atassut siunnersuummut itigartitsisut allatut isumaqarput.

Atassut: Naak pitsanngoriaatit?

Innuttaasut naligiimmik atugaqarnissaannik inatsimmik nutaamik suliaqaannarani, aalajangersimasumik naalakkersuinikkut iliuuseqartoqarnissaanik, Atassummeersoq Bentiaraq Ottosen kaammattuivoq.

- Una siunnersuut itigartinneqarnissaa inassutigaara, takusinnaannginnakku siunnersuummi pitsanngoriaataasinnaasut sumiinnersut, Ottosen oqaaseqartarfimmit oqarpoq.

Naleqqami siulittaasoq Pele Broberg siunnersuummut aamma akerliuvoq. Naalakkersuisut siunnersuutip kikkunnut iluaqutaassanersoq imaluunniit kikkut ”saaffigineqarnersut” ersernerluttuliorsimasut, taanna isumaqarpoq.

Brobergi aamma inatsisissatut siunnersuutip nunap inoqqaavisa pisinnaatitaaffiinut ILO 169-imi atuutsinneqartumut qanoq sunniuteqarnissaanut ernumassuteqarpoq. Kalaallit Nunaat Naalagaaffiit Peqatigiit immikkut nunap inoqqaavi pillugit aallartitaanit nalunaarusiami unioqqutitsisimasoq isornartorsiorneqarneranut, partiimi siulittaasoq innersuussivoq, nalunaarusiaq taanna Naalagaaffiit Peqatigiit Inuit Pisinnaatitaaffii pillugit Siunnersuisoqatigiivinut saqqummiunneqaqqammerpoq.

Inissaqartitsinissamut tunngasoq

- ”Ikinnerussuteqartut” illersorniarneqarnerini, Inuit immikkut illersorneqarnera puigorneqarnerinik isumaqarpoq, taannalu atuutsinneqanngeqattaarpoq imaluunniit akerlilersorneqarluni.

- Siunnersuutip tunngaviusumik isumaa paasisinnaallugu oqaatigaarput. Kisianni pisinnaatitaaffiit oqaatigineqareersut isumageqqaarnagit siunnersuisoqatigiinnik pilersitsinissaq naapertuutinngilaq, Pele Broberg oqarpoq.

Naligiissitaanermut naalakkersuisup, Naaja H. Nathanielsenip (IA), inatsisissatut siunnersuut oqaluttarfimmit illersorpaa:

- Inatsit una kikkut tamarmik assigiilersinneqarnissaannut tunnganngitsoq oqaatigissavara. Assigiinnginnissamut inissaqartitsinissamut tunngavoq. Innuttaasullu kinaassusersiorneqassagaluarpata illersorneqarnissaannut tunngavoq, Naaja H. Nathanielsen oqarpoq, taassumalu aamma naligiissitsinissamut aalajangiisartut pillugit erseqqissaavoq, taamaalilluni inuit eqqartuussivinnukartarnissaat pinngitsoorneqassaaq, tassami tamanna akisuvoq:

- Meeqqamut innarluutilimmut angajoqqaat suliaminnik misiliisitsiffeqarnissaannut tunngavoq. Arnat suliffimminni kinguaassiutitigut kanngunartuliorfigineqartut suliaminnik misiliisitsiffeqarnissaannut tunngavoq, Nathanielsen oqarpoq.

Naalakkersuisut maligassiuisuunnginnerarai

Oqallittoqarnerani Demokraatit oqaaseqartartuata Bjørk Lange Olsenip, Naalakkersuisut naligiissitaanissamut tunngatillugu maligassiuilluanngitsuunerarpai, Naalakkersuisut nutaat toqqarneqartut arfineq-marlunnik angutitaqarlutillu pingasunik arnartaqarmata.

- Tassalu Naalakkersuisuni angutit marloriaataa sinnerlugu amerlanerullutik, arnaniit. Piaaraluni toqqaaneq. Toqqaaneq nalunngilluinnarlugu. Demokraatini isumaqarpugut, uggornartoq, Naalakkersuisut siuttoorusunnginnerat naligiissitaanermut siuttuunermut tunngatillugu. Isumaqarpugut uggornartuusoq, Naalakkersuit siulittaasuata maannakkut Naalakkersuisuusuni arnat amerlanerunissaannik kissaateqarsimannginnera, Bjørk Lange Olsen oqarpoq.

Naaja H. Nathanielsenip nassuiaateqarnermini, arnat angerlarsimaffimmi suli annertuumik suliaqartarnerat erseqqissarpaa, tamatumalu naalakkersuinermik atorfimmi periarfissaannut imaluunniit piumassusaannut sunniuteqarsinnaavoq, kiisalu naalakkersuinermi avatangiisit ilaatigut arnanut peqataaffigissallugit ajornakusoorsinnaasarnerarpaa.