Skip to main content

Asserpassuit: Ittoqqortoormiini aasaanerani tammaarsimaarneq

Foreningen Grønlandske Børn ukioq manna aasaanerani tammaarsimaartitseqqippoq. Tamatumuuna piumassutsiminnik sulisut nunarsuarmit tamarmeersut 14-it ikiortigalugit

Ukioq manna Foreningen Grønlandske Børn nunatsinni illoqarfimmi mikinerusumi aasaanerani nunanit tamalaaneersunik tammaarsimaartitseqqippoq. Siorna tamanna Qaanaami ingerlanneqarpoq, ukioq mannalu Ittoqqortoormiini ingerlanneqarpoq. Tammaarsimaarneq juulip 22-anniit aggustip 19-iannut sivisussuseqarpoq.

Mellemfolkeligt Samvirke suleqatigalugu tammaarsimaffimmi pisortatut toqqarneqarsimapput  kalaallit marluk, piumassutsiminnik sulisut nunarsuarmit tamarmeersut 14-it, kiisalu inuusuttut Qaanaammeersut nutaamik peqataasut marluk.

Taiwan

Tammaarsimaffimmi aqutsisuupput Bebbie Petersen, taannalu Ittoqqortoormiini atuarfimmi ilinniartitsisuuvoq, suleqatigalugu Ivik Kleist, Nuummeersoq. Piumassutsiminnik suleqataasut 14-it nunanit ukunanngaanneersuupput Taiwan, Canada, Hong Kong, Italia, Spania, Portugal, Tyskland, Frankrig, Polen, Sverige Danmarkilu, tamakkualu 20 aamma 35-t akornanni ukioqarput. Tamatuma saniatigut angutit inuusuttut marluk 17 aamma 18-inik ukiullit Qaanaameersut peqataapput.

Ukioq manna siornatulli meeqqat ataasinngornermit tallimanngornermut nalunaaqutaq 12.00 – 18.00 sammisaqartinneqartarput, illoqarfimmiullu tamarmik arfininngornerit tamaasa ataatsimut pisoqartitsineranut qaaqquneqartarput. Meeqqanut sammitinneqarput ilaatigut Lego-t, sapangaaqqat, fimolit, qaqorsaasiorneq, assiliinermik ilinniartitsineq, igalaaminernik qalipaaneq, pinnersaasiorneq qarasarsuutissallu allarpassuit timmisartumik tikiunneqarsimasut, LEGO- mit, Canon-imit Pandura Hobby-meersullu. Tamatuma saniatigut timersortarfimmi arsamik pinnguarnerit, qitinneq, sungiusarneq, akrobatik aammalu nuannisarneq pequernerlu.

Sermitsiaq.AG-mi bloggi

Ukioq manna aasaanerani sammisassaqartitsineq atuartartut malinnaaffigisinnaavaat blog-imi ilannguttakkatigut, taassuminngalu allattuuvoq canadamiu Isabella Flammia, ilanngunneqartarpullu Ena Kurtagic Granulosip assilisai nalissaqanngitsut. Taakkua marluullutik 2014-imi Qaanaameeqataasimapput, ukioq mannalu misigisaq tupinnaannartoq misigeqqinniarlugu utersimallutik.

Isabella Flammiap bloggia uani malinnaaffigiuk:

Kalaallit Nunaannut tikinneq

Pingasunngorneq juulip 22-at, Islandimi sivikitsumik Reykjavikimeereerluta Ittoqqortoormiinut tikippugut. Amerlanerpaartavut aatsaavissuaq helikoptererput, isigisarlu tupinnaannartumik kusanaqaaq pissanganaqalunilu. Kalaallit Nunaata nunaa nalissaqanngitsoq pitsaanerusumit takusinnaallugu takorloorsinnaanngilara. Pinngortitarsuup pinneqaluni mersernarpasilluni isorartoqisup aammaarluni anerneerutingajavippaanga.

Ulluni kingullerni Piareersarfiup kollegiaani inissititerpugut immitsinnullu ilisariniarluta, kiisalu illoqarfimmi meeqqanut, inuusuttunut inersimasunullu sammitikkusavut pilersaarusiorlugit. Tammaarsimaffiup aallartinnissaa meeqqallu pinnguaqatiginissaat qilanaareqaarput. Maannangaaq malugereersinnaavara aasamik tupinnaannartumik nalissaqanngitsumik Kalaallit Nunaanni misigisaqaqqissallunga!

Illoqarfimmiunik naapitsineq

Arfininngormat Timersortarfimmi unnukkut kulturisiornermut illoqarfimmiut qaaqquagut, tamatumanilu illoqarfimmiut siullermeerluta naapippavut. Tamatta immikkut takutitassiorfeeraliorsimavugut nunagisatsinnik takussutissanik. Nunagisarput pillugu paasissutissanik assigiinngitsunik katersuisimavugut, titartaalluta assinillu takutitsilluta, nunagisatsinnik oqaluttualaarsinnaasunik. Tamatuma saniatigut tamatta nunatta iffiugaanik iffiorsimavugut. Tassani ilaatigut sassaatigaavut italiamiutut pizza, spaniamiutut omelet, Taiwanimit nudlerit, manninnik tærtiliat Hong Kongimeersut franskillu pannakaavi. Tamatuma saniatigut Grace, Taiwanimeersoq Sarah-lu Danmarkimeeresoq qitinnermik namminneq aaqqissuussaminnik takutitsipput. Meeqqat inersimasullu 100-t sinnillit takkupput, nerisassallu tamaviisa nungullugit mamarsaatigaat. Unnuk periarfissatsialaasimavoq illoqarfimmiunik naapitsinissatsinnut, illoqarfimmiullu aamma periarfissaralugu uagut nunagisatsinnik kulturitsinnillu paasinnilaarnissaminnut. Aamma uagutsinnut piumassutsimik suleqataasunut, sumiiffiit nerisassaataat misilillugit pissanganarsimaqaaq. Inuusuttuaqqat inersimasullu tuluit oqaasiinik ilisimasaqassusiat kakkageqaara, soorunamilu tamanna pissutigalugu oqaloqatigiinnissaq ajornannginneruvoq, uangami kalaallisut oqalussinnaannginnama.

Tamarmik annilaangamisaaraluarput, akunnernili taakkunani nuannisaqatigeeqaagut pinnguarnerpassuit ingerlallugit, soorlu LEGO-nik pinnguarluni allarpassuarnillu. Illoqarfimmiut inussiarnernerat tammaarsimanerup sinneranut nuannissaqaaq, tamattalu qaammassuaq ilivitsoq maaniinnissarput qilanaareqaarput, ataasinngornermilu nalunaaquttap ullo´qeqqarnissaa utaqqisinnaanngingajavipparput, taamaasippat meeqqanik sammisaqartitsinerit siulliit aallartittussaagatsigit. Tamannali sapaatip akunnerani tullermi oqaluttuariumaarpara.

Tapersersorneqarluartoq

Ukioq manna aasaanerani tammaarsimaartitsineq tapersersorneqarluaqqippoq, ukioq mannalu tapeeqataasimapput Nunafonden, Inuuneritta, Ejnar Mikkelsens Østgrønlandsfond, Lionsklubbernes Grønlandsfond aamma Det Kongelige Grønlandsfond. Tamatuma sanaitigut aasaanerani tammaarsimaarneq tapiiffigineqarpoq Nordlandairimit, Air Greenlandimit, KNI a/s-imit, Pandura Hobbymit, LEGO-mit, Carlsberg Sportsfondimit aamma Canonimit.

Ittoqqortoormiini aaasaanerani tammaarsimaarnermit assit ataani takukkit

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER