Qaqortoq
Asserpassuit: Erinarsoqatigiippassuit katerisimaarnerat
Qanittukkut erinarsoqatigiit inuusuttut utoqqaallu arlalissuit Qaqortumi katerisimaarput. Asserpassuarni nuannisarnerat takukkit
Sapaatip akunnerata naanerani qaangiuttumi kujataani erinarsoqatigiit Qaqortumi katerisimaarput (Kujataamioqatigiit Nipaat katerinnerat, aaqqiss.).
Erinarsoqatigiit katerisimaarnerat aallartippoq tallimanngormat juulip 24-anni nalunaaqutaq 13, tassani erinarsoqatigiit ataatsimoorlutik illoqarfiup qeqqani erinarsoriarlutik nalunaaqitaq 14 Qaqortup Iliveqarfianukarput tussiummillu atuillutik.
Erinarsoqatigiit 11-t tusarnaartitsipput
Nalunaaqutaq 19 erinarsoqatigiit 11-t illoqarfimmiunut tamanut katersortarfimmi tusarnaartitsipput, tamarmik erinarsuutinik toqqakkaminnik marlunnik atuillutik.
Aqaguani unnukkut peqataasut tamarmik, peqataaniarlutillu nalunaarsimasut, timersortarfimmissaaq katerisimaarput - unnuup ingerlanerani erinarsoqatigiit erinarsorpalaarnerat tusarsaajuarluni.
Arfininngornikkut kingusinnerusukkut aappariit Qeqertarsuarmeersut Johanne & Erik Wille unnuakkut ataatsip tungaanut qititsitsipput.
Siulittaasoq qinigaaqqippoq
Katerisimaarnermi ataatsimeersuarneq ingerlanneqarpoq, tassani oqaloqatigiissutigineqarluni erinarsoqatigiit aappaagu katerisimaarnissaanni kikkut aaqqissuussisuussanersut.
Kujataani erinarsoqatigiit kattuffiannik erinarsoqatigiit Qaqortormiut kattuffimmik ingerlatsineq ingerlateqqissavaat Jens Peter Kielsen siuttoralugu.