Assartuinerup akitsornissaa Siumukkormiup akerlilerpaa

Naalakkersuisut Royal Arctic Line akueraat assartuinermi akinik 2014-mi 5 procentimik qaffaasinnaasoq 2015-milu nalimmassaaqqilluni. Taama aalajangerneq Siumut sinnerlugu Inatsisartut ilaasortap Karl-Kristian Krusep akerlilerpaa inuuniarnermi aningaasartuutit qaffaqqinnissaat aarleqqutigalugu.

Assartukkat ikinerat pissutigalugu Royal Arctic Line arlalinnik umiarsualiortussanngortoq, assartuinermi akinik qaffaavoq. Periarfissap aapparisimagaluarpaa umiarsuit akuttunerusumik tikittalernissaat. Tamatumali nioqqutissanik assartuinermik eqquinerlunissaa aarleqqutigineqarpoq. Taamaattumik Naalakkersuisut sapaatip akunnera kingulleq akuersipput Royal Arctic Line assartuinermi akinik qaffaasinnaasoq.

Akit qaffaqqinnissaat
- Assartuussinermi akit qaffannerat inuiaqatigiinnut annertuumik sunniuteqassasoq kialuunniit takusinnaavaa, tamannalu ullumikkut killiffiusoq eqqarsaatigalugu innuttaasunit nammanneqarsinnaanngilaq, Karl-Kristian Kruse tusagassiutinut nalunaarummini allappoq.

Assartuinermi akit qaffannerisa akitsortissinnaasaat taakkartorpai.

- Nioqqutissat akitsussapput, kalaalimernit aattaat iluamik akitsussapput, sanaartugassat akisunerulissapput, ineqarnermut najuqarneq akisunerulissaaq sutigullu tamatigut inuit aningaasartuutaat qaffassapput, Karl-Kristian Kruse uparuaavoq.

Taanna paragraf 37 naapertorlugu naalakkersuisunut apeqquteqarnikuuvoq umiarsuatigut assartuinermi unammilleqatigiineq eqqunneqalersaarnersoq paasiniarlugu. Taamali pisoqarnissaa pilersaarutaanngilaq.

- Naalakkersuisut inuuniarnerup oqinnerusumik ingerlalernissaanik suliaqarnerusariaqartut isumaqarpunga tamannalu suleqataaffigerusuppara oqaloqataaffigalugulu. Aqqutissaalluartumimmi apeqquteqarsimalluga takusinnaalluarpara tamannalu naalakkersuisut siunniutissagaat sakkortuumik kaammattuutigaara, tassalu imaatigut assartuussinermi unammillertoqalissasoq, Karl-Kristian Kruse oqarpoq.