akitsuinerit
Assartuinermut akiliinerusalissaagut
Assartuinermut akit 2014-mi 2015-milu qaffannissaat naalakkersuisut akueraat
Assartuinermi akit 2014-mi 5 procentimik qaffassapput 2015-milu akinik nalimmassaasoqaqqissalluni. Inuussutissarsiortut akerliugaluarput akitsuinerit atuisunit akilerneqartariaqassammata. Taamaattoq akitsuinissaq naalakkersuisunit akuerineqarpoq.
- Assartuinermi akigititat annikinnerpaamik qaffanneqassasut Naalakkersuisut kissaatigisimavaat. Aaqqiinerup toqqakatta Royal Arctic Line A/S-ip peqqinnartumik ingerlatsinissaa qulakkiissavaa, tamannalu tamatsinnut iluaqutaasussanik ingerlatseqatigiiffiup umiarsuarni nutaani aningaasaliisinnaaneranut tunngaviulluni, peqqissutsimut attaveqarnermullu naalakkersuisoq Steen Lynge Atassummeersoq oqarpoq.
Qaffaanissaq pinngitsoorniarlugu periarfissaasimagaluarpoq umiarsuit akuttunerusumik tikittarnissaat. Tamannali nioqqutissamik pilersuinermut ajorseriaataasinnaavoq nioqqutissat amerlanerit timmisartukkut tikisinneqartalersinnaammata pisiassat akitsornerannik kinguneqartumik
- Naalakkersuisut aalajangerput poortugaaqqanik nassiussinermi akigititat qaffassanngitsut. Royal Arctic Linep naatsorsuutaani tamarmiusuni nassiussanit annikitsunit isertitat annikitsuinnaapput. Paarlattuanilli nunatta illuatungaani ilaquttatsinnut ikinngutitsinnulluunnit poortukkanik nassiussileraangatta annertunerusumik akiliissannginnerput ilinnut uannullu naleqartorujussuulluni, Steen Lynge oqarpoq.