Assartuinermi tapiliuttagaq qaffaqqinneqartoq - maanna 29 procentiulerluni

Royal Arctic Linep uuliamut aningaasallu nalinginut tapiliuttagaq qaffappaa.

Royal Arctic Linep (RAL) orsussamut akigitinneqartup qaffakkiartuinnarnera pissutigalugu uuliamut aningaasallu nalinginut tapiliuttagaq qaffaqqissimavaa.

Maannakkut tapiliuttagaq 23.25 procentimiit 29,54 procentimut qaffanneqarpoq. Qaffaassut juulip aallaqqaataaniit atuutilissaaq.

- Imaatigut assartuinermut suliarineqarnerannullu akiusoq ullumikkut 2.000 koruuniusimappat, taava uuliamut aningaasallu nalinginut tapiliuttagaq taakku qaavisigut 591 koruunit akiliutigineqassapput, RAL-imit allapput.

Tapiliuttagaq ukiup affaani kingullermi arlaleriarluni qaffanneqartarsimavoq. Decembarip qaammataani 6,3 procentiusimalluni.

Royal Arctic Linemit allapput, uuliamut aningaasallu nalinginut tapiliuttagaq uuliap akiisa aningaasallu nalingisa nalorninartoqarnerinut ingerlatseqatigiiffik isumannaallisarniarlugu atorneqartoq.

Powered by Labrador CMS