Assammik arsartoq Kalaallit Nunaat qimallugu unammisartunngorpoq: Danmarkimi unammisartunngorusuppunga

Assammik arsartartut tallimat ukiumi unammiffiusumi aggersumi nunani allani unammisalissapput.

Nuunu-Marie Lukassen, Sandra Rothberg aamma Nukaaka Petrussen Lyberth Savalimmiuni unammisalissapput, Pilunnguaq Rosing Wille kiisalu Nivi Jensen Petersen Danmarkimi unammisalissallutik.

Sungiusarnerpassuit

Savalimmiuni ligami pitsaanermi unammisalertussaq, Nuunu-Marie Lukassen, Sermitsiaq.AG-mit oqaloqatigineqarpoq.

- Ilinniarnera ingerlallugu Danmarkimi unammisartunngornissara pilersaarutaanikuugaluarpoq. Nunanulli allanut unammisartut sungiusaqatigiinneranni februaarimi periarfissinneqarpunga Savalimmiunut nuussinnaallunga, højrefløjitut unammisartoq oqarpoq.

Sungiusaqatigiinnermi aperineqarpoq Savalimmiuni unammisartunngorusunnginnersoq.

- Eqqarsaatigilluareerlugu Neistin-imi unammisartunngussallunga aalajangerpunga, aggustillu aallartinnerani tikillunga. Ullut tamaasa sungiusartarpugut, tassani qasujaallisartarpugut, nukkassartarluta unammisarfimmilu sungiusartarluta. Ilaannilu ullormut marloriarluta sungiusartarluta. Unammisaqattaarnerit aallartingajalermata maannakkut taktikkikkut sungiusarneqarneruvugut, Nuunu-Marie Lukassen oqaluttuarpoq.

Danmarkimi unammisartunngornissani takorloorpaa

Nunani allani unammisalerumaarnissani pilersaarutaajuarsimasoq oqaatigaa.

- Unammisartunut piumasaqaateqartuarpoq, taamatullu piumaffigineqarnermut iluareqaara. Sungiusarnerni tunniusimajuarpunga, unammisarfimmilu inissara annaajumanagu sungiusarnerni pimoorussiuarlunga. Kalaallit Nunaanni taamatut piumaffigineqarneq misiginikuunngilara, taamaattumik maaniinnera nuannareqaara, oqarpoq.

Savalimmiuni unammisartooreeruni Danmarkimi unammisartunngorusulluni oqaatigaa.

- Danmarkimi pitsaanerit akornanni unammisartunngornissara takorluugaraara. Danmarkimi 2. divisionimi unammisartooreerpunga, coronali pissutaalluni angerlarnikuullunga. Taamani Nykøbing Falster Håndboldip ligami unammisartuisa sungiusaqatiginissaannik periarfissinneqarnikuuvunga. Sungiusaqatiginerini malugivara malinnaalluarsinnaallunga. Sungiusarnera maannakkutut isikkoqartillugu imminut tatigaanga Danmarkimi pitsaanerni unammisartunngorsinnaallunga, oqaluttuarpoq.

Ineriartortuarnissaq

Unammisartutut pitsaanerulernissani anguniarpaa, tamannalu nunanut allanut unammisartunut sunniuteqarluarsinnaasoq oqaatigaa.

- Pitsanngortuarnissaq anguniagaajuarpoq. Nunani allani unammisartuni ataqatigiilluarnikkut ineriartorluarsinnaavugut, taamaattoq VM angussagutsigu unammisartutut ataasiakkaatut aamma ineriartornissaat pisariaqarpoq. Nunanut allanut unammisartunut suli tunniussaqarsinnaanerissallunga upperaara, tamannalu holdimut iluaqutaalluarsinnaavoq.

Ukioq kingullermi unammisaqattaarfiusumit pitsaanerulernissani imminut naatsorsuuteqarfigaaq.

- Sungiusarnerit sakkortunerummata naatsorsuutigilluinnarpara unammisartutut pitsaanerulissallunga, NÛK-mi unammisartuusimasoq Nuunu-Marie Lukassen oqarpoq. Savalimmiuni unammisaqattaarnerit qaammammi matumani aallartissapput.

Nunanut allanut unammisartunut sungiusaasoq nuannaarpoq

Unammisartut arlallit Kalaallit Nunaat qimallugu unammisartunngornerat nunanut allanut unammisartunut sungiusaasup Anders Friisip nuannaarutigaa.

- Unammisartut nunani allani unammisartunngorlutik angerlarsimaffitsik qimallugu aallarnerat nersorpara. Nuummi unammisartut atugaat pitsanngorsarniarpakka, taamaattumik unammisartut nunani allani misilittagaqarnerulernissaat, angerlaqqikkunillu misilittakkatik unammisartunut ingerlateqqinnissaat neriuutigilluinnarpara, Anders Friis oqarpoq.

Ukiumi unammisaqattaarfiusussami unammisartut amerlasooriarlutik unammisarnissaat nunanut allanut unammisartunut nukittorsaalluassasoq oqaatigaa.

- Unammisaqattaarnerusalerpata, sungiusarluarnerusalerpatalu iluaqutaaginnassaaq. Nunanut allanut unammisartut sungiusaqatigiikkaangata kisimi ineriartortoqartassanngilaq. Ulluinnarni sungiusarnerni ineriartorluartoqartassaaq, taamaattumik timersoqatigiiffimminni sungiusarnerat pingaaruteqarneruvoq. Unammisartut nunani allani unammisartunngorusuttunut tapersersuiuassaanga, oqarpoq.

Unammisartunut piumasaqaatit

Nunanut allanut unammisartut aappaagu VM-imut anngunniuteqqittussaapput. Unammersuaarneq Kalaallit Nunaanni ingerlanneqarsinnaavoq, qaqugu sumilu unammissutaassanersoq suli inissinnikuunngilaq.

- Unammisartut arlaqartut nunani allani unammisalernerat ajunngeqaaq. Unammisartut, Kalaallit Nunaanni najugaqartut, kattuffillu aamma imminnut piumasaqartariaqarput, Anders Friis oqarpoq.

Sungiusaqatigiittoqarnerani periarfissaq takkuttoq

Angutit nunanut allanut unammisartunut sungiusaasorisimasaat, Ingi Olsen, maanna Savalimmiuni Vestmannami sungiusaasuuvoq. Timersoqatigiiffiup titarnerup killingani unammisartoq Sandra Rothberg unammisartugileqqammerpaat. Sandra Rothberg qanoq unammisartorilersimanerlugu ima oqaluttuarpoq:

- Arnat Savalimmiuni sungiusaqatigiinneranni nunanut allanut unammisartunut sungiusaasoq oqaloqatigaara. Unammisartut ataavarnerusumik unammisalernissaat kissaatiginikuuaa, tassungalu ikiuutaasinnaalluta oqarfigaara. Maanna unammisartut pingasut nuussimalerput, taakkununnga Sandra Rothberg ilaavoq.

Iluaqutaalluassasoq

Unammisartoq angisooq nukittoorlu arsartorilersimallugu oqaatigaa. Aamma tikilluaqquneqarluarsimasoq oqaatigalugu.

- Unammiffiup avataani aamma tikilluaqquneqarluarpoq. Taamaammat Sandra maanga nuukkusunnera nuannaarutigaara. Sandra sungiusarluaannaruni unammisaqattaartalerlunilu, nunanut allanut unammisartunut tunniussaqarluarsinnaassasoq naatsorsuutigaara. Imaassinnaasoq aamma kalaallit amerlanerusut maanga unammisartunngorusulissasut, Ingi Olsen oqarpoq.