Assammik arsartartut tamaviaassaqaat

Naalagaaffiit peqataasut qulingiluat immikkoortunut tallimanut inissititerneqarput. Argentina Brasilialu immikkoortoq siullermi. Uruguay Chilelu immikkoortup aappaani. USA aamma Kalaallit Nunaat immikkoortut pingajuanni. Venezuela Mexicolu immikkoortut sisamaanni kiisalu Guatemala immikkoortut tallimaanni. Cuba peqataasinnaanani nalunaarsimavoq. Taamaattumik naalagaaffiit peqataasut qulingiluaannaapput.
Amerlasuut isumaqassagaluarput Kalaallit Nunaat immikkoortut aappaaniittariaqaraluartoq Uruguay taarsiullugu, taamaasilluni Kalaallit Nunaata Chile, tamatigut naligiiffigisaqalugu unammisartakkani, unammissanagu. Siullermik apparlernut pingasunut makitsisoqarpoq. Taavalu Brasiliap Argentinallu akornanni makitsisoqarpoq. Naggataatigullu Uruguay Chilelu inissinneqassapput. Uruguay-p makitsinertaqanngitsumik Gruppe A toqqarpaa, pulje B-mit ajornanngippasinnerusoq. Chile Gruppe B-mut Kalaallit Nunaat peqatigalugu inissinneqarpoq.

Puljet marluk
Gruppe A
Brasilia
Uruguay
USA
Venezuela
Guatemala

Gruppe B
Argentina
Chile
Kalaallit Nunaat
Mexico
Nunanut allanut unammisartuvut tamaviaassaqaat 2015-imi januaarimi Qatarimi VM-eqarnissaani inissat pingasut ilaat pissarsiarissagunikku. Pisarnertut pisoqassappat Brasilia Argentinalu finalimi naapissapput. Qularnanngitsumik normu 3-ngorniutissapput Uruguay, Chile aamma Kalaallit Nunaat. Kalaallit Nunaannut unammineq pingaarutilik tassaassaaq Chilemut unamminissaq.
Soorunami kissaatiginarpoq Kalaallit Nunaata Chile Argentinalu ajugaaffigisinnaassagai finalimullu anngulluni.
Unammiuaarneq ingerlanneqassaaq Montevideomi juunip 23-anniit 29-annut. Unamminissat suli inissititerneqanngillat.

Piareersarnerit ingerlaqqipput
Ataasinngornermi juunip 16-ianni sungiusaqatigiittoqariissaaq. Unammisartut Danmarkimi najugallit Københavnimi Vesterbromi Bavnehøjkhallenimi sungiusaqatigiissapput, unnukkullu 1. divisionimi unammisartoq Ajax København sungiusaatigalugu unammissavaat.