Assammik arsartartut Savalimmiunut nuupput
Inuuteq Heilmann aamma Gerth Johansen Savalimmiuni assammik arsartartut timersoqatigiiffianni Vestmanna Idrætsforening-imi unammisartunngussapput
Assammik arsartartut Sisimiuneersut, 18-nik ukiulik Inuuteq Heilmann aamma 19-nik ukiulik Gerth Johansen Savalimmiuni timersoqatigiiffimmi unammisartunngorput.
Vestmanna Idrætsforening-imi unammisartunngussasut Bigi Connect tusagassiutinut nalunaarummi allappoq.
Ineriartornerat pissanganartoq
Inuusuttut Nunatsinni pissartanngorniunneranni ukioq manna taakku takutitsilluarput. Angutit nunanut allanut unammisartuisa sungiusaasuata Ingi Olsenip Savalimmiunut nuunnissaannut suleqataavoq.
- Assammik arsallaqqissuullutillu sungiusarnerit saniatigut aamma namminneerlutik sungiusartarnerisa pissutigisaannik Savalimmiunut nuutsinnissaannut suliniarnissaq soqutiginalersimavoq. Klubberiligassaat assammik arsartartorpassuarnik ukiuni amerlasuuni ineriartortitsisareerpoq. Ineriartornerat malinnaaffigissallugu pissanganassaaq - Savalimmiuni najugaqarnerminni aamma ataavartumik suliffeqassapput, Ingi Olsen tusagassiutinut nalunaarummi oqarpoq.
Nunanut allanut unammisartunngorsinnaaneq
Inuuteq Kreutzmann aamma Gerth Johansen ukioq naallugu ataavartumik unammisalernissaminnut qilanaarput. Klubbertaaminni unammisartutut pingaarnertut inissinnissartik neriuutigaat. Siunissami nunanut allanut unammisartunngornissaat anguniagaasoq Ingi Olsen oqarpoq:
- Assammik arsartarneq allatuulli inissisimavoq. Sukataarlutit pimoorussillutillu piguit qanorsuaq angusaqarsinnaavutit. Inuuteq Heilmann aamma Gerth Johansen angusaqarluarnissamut periarfissaqarluarput. Sungiusarnerit saniatigut sungiusartarsinnaagunik nunanut allanut unammisartuulernissamut periarfissagissaarlualissapput, tamanna angusinnaagaat qularinngilara.
Sisimiunit Savalimmiunut noorlaat Vestmanna-mut tikeriarunik sungiusaqataasalissapput. Savalimmiuni assammik arsarluni unammisaqattaarnerit septembarip qeqqani aallartissapput.