Assammik arsartartut kattuffiata politikerinik suleqateqarnissaq neriuutigaa
Assammik arsarneq siuariartussappat kommunit aamma qinikkat suleqataasariaqartut assammik arsartartut kattuffinni siulittaasoq Jørgen Isak Olsen oqarpoq. - Unammersuariaaseq allanngortinneqassappat suleqatigiittoqartariaqarpoq, oqarpoq
Assammik arsarnermi unammersuariaatsip allanngortinneqarnissaa assammik arsartartut kattuffiata ukiuni marlunni maanna sulissutigineqareerpoq, tassani ukiumut unammisarnerit amerlanerulernissaat sulissutigineqarluni.
Tamannali ukioq manna piviusunngornavianngitsoq kattuffiup siulittaasuata Jørgen Isak Olsenip oqaatigaa. Ukiuni qaninnerusuni aamma piviusunngornissaa naatsorsuutigineqanngilaq.
Kisimiilluni kivitsisinnaannginneq
- Kattuffiup tamanna kisimiilluni kivissinnaanngilaa. Tapersersorneqarnissamik pisariaqartitsivugut, tassani kommunit aamma nuna tamakkerlugu politikkikkut qinikkat suleqataasariaqarput. Kattuffik aamma nammineerluni aningaasaliisussanik ujaasereeraluarpoq nunani allani Nunatsinnilu. Kommunit tamakkerlugit tamanna pillugu saaffigaagut, uggornartumik kommuni ataasiinnaq saaffiginnissutitsinnut akissuteqarpoq, Jørgen Isak Olsen oqarpoq.
Oktobarimit maaji ilanngullugu unammersuaartoqartalernissaa kattuffimmit suliniutigineqarpoq, timersoqatigiiffiit pitsaanerpaatut inissittut sisamat unammersuaartinneqartalernissaat siunnertarineqarluni. Kattuffik ukiumut 2,4 million koruuninik pissarsisarpoq, tamannalu annikippallaartoq siulittaasoq oqarpoq.
Politikerit suleqataanissaat
- Pilersaarutip piviusunngortinneqarnissaa upperaara, taamaattoq malunnaatilimmik allannguuteqartoqartoqartariaqarpoq - assammik arsarneq kisimi eqqarsaatiginagu timersuutini tamani - politikerit malinnaasariaqalerput. Tips og Lotto-nit tapiissutit naammakkunnaarput, paasineqartariaqalerpoq aamma timersorneq qanoq inuiaqatigiinnut pingaaruteqartiginersoq. Pinaveersaartitsinerup tungaatigut sunniuteqaqataasorujussuuvoq timersorneq, oqarpoq.
Taamaattumik qaqagu unammersuariaaseq allanngortinneqassanersoq suli nalunarpoq. Ukioq manna pissartanngorniunnissaq kinguartinneqareerpoq coronavirusi pissutaalluni. Ukiaru pissartanngorniunneq ingerlanneqassaaq.