Assammik arsartartut kattuffiata meeqqat pisinnaatitaaffii nittarsaatissavai
Suleqatigiinnermi nutaami Timersoqatigiit Assammik Arsartartut Kattuffiat (TAAK) meeqqat pisinnaatitaaffii pillugit ilisimasat annertusarnissaannut aamma isumalimmik toqqissisimasumillu ataatsimoorfinnut sulissuteqarnissamut pisussaaffeqalerpoq.
Maanna Unicef/Nakuusa nunanut allanut unammisartut atisaanni saqqumilissapput. Tamanna TAAK-ip aamma Unicef-ip akornanni suleqatigiinneq nutaaq tunuliaqutigalugu pivoq. Unicef aamma TAAK tusagassiuutinut nalunaarummi taama allapput.
Inersimasut kattuffimmiittut meeqqanut maligassiuisutut inissisimanerminnik ilisimanninnissaannik aamma inuusuttut naleqartitaat pillugit ukkatarineqarnissaannik kattuffiup anguniagaata sulissutigineqarnissaanik nunallu tamarmiusup assammik arsarnermik tulluusimaarutiginninnissaannik, suleqatigiinneq ilaatigut isumaqarpoq.
Suli suliassarpassuaqartoq
Unicef 2011-mili Kalaallit Nunaanni suliaqarpoq, piffissamilu tassani kalaallit meeqqat akornanni meeqqat pisinnaatitaaffiinut ilisimanninneq annertuseriarujussuarpoq. Kisianni nunatsinni suli annertuumik suliassaqarpoq, tassami meeqqat pingajorarterutaat atugarliorput, suleqatigiit tusagassiuutinut nalunaarummi oqarput.
- TAAK-mik suleqateqarnermi inersimasut akornanni meeqqat pisinnaatitaaffiinik ilisimasat annertusineqarnissaannut oqariartuuteqarfissamik pilersitsisoqarpoq, meeqqat toqqissisimanissaannut pitsaanerpaanik sinaakkusiinissamut atugassaqartitsisumik.
- Isumaqatigiissutip ilaani sungiusaasut unammisartullu suleqatigiinnermi anguniakkap piviusunngortinnissaanut ilinniartinneqassapput.
- Nunanut allanut unammisartut tamarmik meeqqat pisinnaatitaaffiini piginnaasatigut ineriartortitsiffiussapput.
- Nunanut allanut unammisartunut isumaqatigiissummik suliaqartoqassaaq, maligassiuisuunermi suliassat piumasaqaatillu malitsigitinneqartussat pillugit.
- Unicef nunanut allanut unammisartunut piginnaasanik ineriartortitsinermik suliaqassaaq.
Isumaqatigiissut ukiuni pingasuni atuutissaaq, siulersuisullu piginnaasanik ineriartortitsinikkut kattuffiup nukittorsarneqarnissaa nuannaarutigaat.
- Assammik arsarnermut tunngatillugu pikkorissunik sungiusaasoqarnissatta pilersaarutaanerata saniatigut aamma meeqqat pisinnaatitaaffii pillugit ilisimasanik siammarterinissaq pingaaruteqaqaaq, tamannalu periusissatsinnut naleqquppoq, assammik arsartartut kattuffianni siulersuisunut ilaasortaq, Eqalunnguaq Kristiansen oqarpoq.